«Salidarnaść» vyśviatlała ŭ palitołahaŭ, u čym pryčyna maŭčańnia Alaksandra Łukašenki ŭ situacyi z rejsam MN17.
Palityčny analityk Alaksandr Kłaskoŭski: «Łukašenka časta zryvajecca na emacyjnyja ekspromty, a potym škaduje»
- Heta maŭčańnie biełaruskaha prezidenta zrazumiełaje, - adznačaje ekśpiert. - U takich vybuchovaniebiaśpiečnych temach Łukašenka ŭmieje trymać jazyk za zubami. Pry tym, što jon časta zryvajecca na emacyjnyja ekspromty, a potym škaduje. U jaho jość mocnaje palityčnaje čućcio, i kali sprava pachnie smažanym, jon umieje vytrymać paŭzu.
Palitołah adznačaje praciah abranaj raniej linii łaviravańnia na praciahu ŭsiaho kanfliktu pamiž Kijevam i Maskvoj.
- Znoŭ pamiž mołatam i kavadłam, - kanstatuje surazmoŭca «Salidarnaści». - Z adnaho boku, niama nijakaj racyi psavać adnosiny z Ukrainaj. Ź inšaha - masa abaviazacielstvaŭ pierad Rasijaj, u tym liku i chaŭruśnictva ŭ vajskovaj śfiery. Skažaš ci zrobiš toje, što nie spadabajecca Maskvie, - tam mohuć i kranik prykrucić. Tak što davodzicca «filtravać bazar».
Mierkavańnie suśvietnaj supolnaści składajecca nie na karyść Rasii, a Kijeŭ i Maskva praciahvajuć abmieńvacca ŭzajemnymi abvinavačvańniami.
- Zachodnija dumka schilajecca da vysnovy, što naŭprost ci ŭskosna ŭ trahiedyi, jakaja zdaryłasia, vinavataja Rasija, - praciahvaje ekśpiert. - navat nie pryhladajučysia asabliva, vidać, što jaje vušy ŭsiebakovaj padtrymki, u tym liku i zbrojaj, tyrčać u sieparatystaŭ na Danbasie. Kali aficyjny Minsk vykažacca ŭ padobnym klučy, to ŭ Kramli heta vykliča zuboŭny skryhat. A admyvać Rasiju - aznačaje naklikać na siabie hramadskaje abureńnie i dadatkova ŭskładnić adnosiny z Zachadam, jaki, padobna, pamknuŭsia surjozna ŭzmacnić sankcyi i zahnać Rasieju ŭ kut.
Kłaskoŭski praciahvaje, što traplać pad sankcyi prosta tak, za kampaniju z uschodniaj susiedkaj, nie chočacca. Tamu Alaksandr Łukašenka raniej prademanstravaŭ šerah simvaličnych žestaŭ, jakija aznačajuć hatoŭnaść siabravać z novaj uładaj u Kijevie.
- Pakul Biełaruś zachavała hety dypłamatyčny bałans u trykutniku Kijeŭ - Minsk - Maskva, i nie choča parušać jaho nadalej. Heta jak raz toj vypadak, kali Łukašenka budzie strymanym, i pakul nie ŭlažacca historyja, addaść pieravahu abo naohuł jaje nie kamientavać, abo abmiažoŭvacca niejtralnymi frazami. Nie vyklučana, što praz hod ci dva, jon u intervju razhavorycca i ŭspomnić niešta, jak u svoj čas pra Muamara Kadafi, jakoha na momant ščyraści ŭžo nie było ŭ žyvych.
Akademičny dyrektar Biełaruskaha instytuta stratehičnych daśledavańniaŭ (BISS) Alaksiej Pikulik: «Jamu niavyhadna štości kamientavać»
- Dumaju, što Alaksandru Łukašenku niavyhadna štości kamientavać, - adznačaje ekśpiert. - Jon robić vielmi pravilna: čakaje vynikaŭ rasśledavańnia IKAO, zamiest taho kab stanavicca ŭ pazicyju ekśpierta pa SPA i razhladać roznyja viersii, u tym liku i kanśpirałahičnyja. U situacyi, pakul jon moža nie rabić nijakaj zajavy, jon hetaha zajavy nie robić. I robić całkam słušna.
Palitołah Valeryj Karbalevič: «Kali kamientary ŭsio ž źjaviacca, to heta buduć zakliki i zajavy ŭ styli« treba žyć mirna»
- Dumaju, što ŭ vypadku z rejsam MN17 spracoŭvaje taja ž łohika, što i ŭ dačynieńni da ŭsiaho ŭkrainskaha kryzisu: sproba zachavać niejtralitet i nie ŭmiešvacca ŭ kanflikt na lubym baku. Z adnaho boku my - sajuźnik Rasii. Ź inšaha - Łukašenka razumieje, što Pucin užyŭ siłu dla pašyreńnia tak zvanaha «russkoho mira», pahroza jakoha raspaŭsiudžvajecca i na Biełaruś.
Aficyjny lidar upieršyniu zavualavana skazaŭ pra takuju pahrozu, vystupajučy ŭ Minsku 1 lipienia na ŭračystym schodzie, pryśviečanym 70-j hadavinie vyzvaleńnia krainy ad niamiecka-fašysckich zachopnikaŭ i Dnia niezaležnaści.
- U lubym vypadku, Łukašenka ni z kim nie choča psavać adnosiny: ni z Ukrainaj, ni z Rasiejaj, ni z Zachadam. Zychodziačy z hetaj łohiki, a taksama z taho, što pakul situacyja z krušeńniem łajniera da kanca nie jasnaja, jon dystancyjujetsia ad kamientaroŭ z hetaj nahody. Kali kamientary ŭsio ž źjaviacca, to heta buduć zakliki i zajavy ŭ styli «treba žyć mirna».
