6 lutaha śviatkujecca stahodździe z dnia naradžeńnia paeta Arkadzia Kulašova. «Naša Niva» ŭzhadvaje piać cikavych faktaŭ ź jaho bijahrafii.
Rańni debiutant ź italjanskimi karaniami
Maci Kulašova była biełaruskaj. A voś baćka mieŭ dalokija italjanskija karani. Jahony pradzied — syn arhanista-italjanca.
Svoj pieršy vierš Kulašoŭ napisaŭ u 6 hod, pačaŭ drukavacca ŭ 12. A ŭžo ŭ 1930 hodzie, kali paetu spoŭniłasia ŭsiaho 16, vyjšła jaho pieršaja kniha «Roskvit ziamli».
Słavu pryniesła historyja pieršaha kachańnia
U 14-hadovym uzroście Kulašoŭ napisaŭ svoj chrestamatyjny vierš «Alesia» («Byvaj, abudžanaja sercam, darahaja»), pryśviečany svajmu pieršamu kachańniu. Realnaja Alesia była starejšaja za Arkadzia na dva hady. Ich šlachi razyšlisia.
Paźniej kampazitar Ihar Łučanok napisaŭ muzyku da pieśni, jakuju šmat hadoŭ vykonvali «Pieśniary»
Byŭ kamunistam, ale nie stalinistam
Kulašoŭ ščyra vieryŭ u kamunistyčnyja ideały. Zhadajem jaho radki «Ćviorda trymaŭsia junak na daprosie» i «Kamunisty — heta słova, jak sa stali». U časy represij Kulašoŭ ź ciažkaściu paźbieh aryštu. A paśla vajny dobranadziejnaść paeta była papsavana tym, što jaho baćka padčas akupacyi suprać voli byŭ vybrany starastam.
Paśla XX źjezda Kulašoŭ maŭčaŭ vosiem hadoŭ, a potym jaho paezija vyjšła na novy ŭzrovień.
Pierakładaŭ, kali adpačyvaŭ ad vieršaŭ
Kulašoŭ moh pracavać pa 16 hadzin u sutki i pryzvyčaiŭsia da takoha rytmu žyćcia. Tamu, kali adpačyvaŭ ad napisańnia vieršaŭ, pierakładaŭ. Jon uvasobiŭ na biełaruskaj movie «Cyhana» i «Jaŭhienija Aniehina» Puškina, paeziju Lermantava, «Enieidu» Katlareŭskaha i «Śpieŭ ab Hajavacie» Łanhfieły. Adnojčy ruski paet Michaił Dudzin na poŭnym surjozie skazaŭ Kulašovu, što jaho pierakład «Jaŭhienija Aniehina» lepšy za aryhinał.
Sustreŭsia z Alesiaj praz 50 hadoŭ
Paśla 50-hadovaha pierapynku, kali Arkadziu i Alesi ŭžo było za šeśćdziasiat, jany pačali listavacca. Žonka staviłasia da hetaha spakojna, ale całkam tak i nie daravała, bo pamiatała pra raniejšyja ramany paeta.
Kulašoŭ damoviŭsia sustrecca sa svaim pieršym kachańniem u Bychavie. Kulašoŭ raskazvaŭ dačce, što zazirnuŭ u akno pošty, dzie była pryznačana sustreča, i… napałochaŭsia. Jon ubačyŭ nie junačaje kachańnie, a žančynu svajho ŭzrostu… I kinuŭsia naŭcioki.