Z naznačeńniem Mitrapalita Paŭła Patryjaršym Ekzarcham usioj Biełarusi źviazvajuć nadziei na pieraŭtvareńni va ŭnutranym žyćci carkvy, na aktyvizacyju jaje sacyjalnaha słužeńnia i aśvietnickaj dziejnaści.
Ab hetym zajaviŭ Alaksandr Łukašenka na cyrymonii ŭručeńnia premii prezidenta «Za duchoŭnaje adradžeńnie», śpiecyjalnych premij prezidenta dziejačam kultury i mastactva, śpiecyjalnaj premii prezidenta «Biełaruski spartyŭny Alimp» 2013 hoda.
«Dla nas vielmi važna, što novym kiraŭnikom Biełaruskaj pravasłaŭnaj carkvy staŭ čałaviek mudry, vopytny, jaki pabačyŭ śviet», - skazaŭ Łukašenka.
Jon zapeŭniŭ, što dziaržava akaža ŭsiamiernuju dapamohu Mitrapalitu Paŭłu ŭ realizacyi jaho inicyjatyŭ. Kiraŭnik dziaržavy źviarnuŭsia da naroda z prośbaj pryniać Mitrapalita Paŭła jak svajho, rodnaha pa duchu čałavieka.
Alaksandr Łukašenka adznačyŭ, što ŭ krainie lubiać Fiłareta, jaki addaŭ 35 hadoŭ słužeńniu carkvie ŭ Biełarusi. Jon vykazaŭ nadzieju, što Fiłaret spravicca z chvarobaj i «zaŭsiody budzie ŭ našych šerahach».
Łukašenka taksama źviarnuŭ uvahu, što siońnia pravasłaŭnaja carkva źjaŭlajecca adnym z duchoŭnych słupoŭ hramadstva i adzinaj kanfiesijaj, ź jakoj urad zaklučyŭ pahadnieńnie ab supracoŭnictvie.
Pavodle słoŭ Mitrapalita Paŭła, Fiłaret uźniaŭ na vysoki ŭzrovień uzajemadziejańnie dziaržavy i carkvy. «Ja pastarajusia, kab toje, što zrabiŭ Fiłaret, pradoŭžyłasia, kab my nie razburali, a stvarali», - skazaŭ jon.
Mitrapalit Pavieł z zadavalnieńniem adznačyŭ, što ŭ hetyja kaladnyja dni ŭ Biełarusi robicca akcent na duchoŭnaje adradžeńnie, a heta, na jaho dumku, sadziejničaje praćvitańniu krainy.
Jon taksama padkreśliŭ, što słovy kiraŭnika krainy źjaŭlajucca jasnaj, namiečanaj prahramaj, pa jakoj pavinien iści kiraŭnik biełaruskaj carkvy.
Mitrapalit pieradaŭ ad imia Śviaciejšaha Patryjarcha Maskoŭskaha i ŭsioj Rusi Kiryła kiraŭniku Biełarusi i ŭsiamu biełaruskamu narodu błahasłavieńnie, mir i luboŭ.
