Supracoŭniki staličnaj finansavaj milicyi Kamiteta dziaržkantrolu sumiesna z Kamitetam dziaržbiaśpieki i padatkovaj inśpiekcyjaj pa Minsku spynili cieniavuju schiemu ŭvozu i prodažu mabilnych telefonaŭ praź internet-mahaziny.
Jak paviedamiła pres-słužba KDK, zatrymanaja hrupa hramadzian, jakaja zajmałasia niezakonnaj pradprymalnickaj dziejnaściu. Jany zavozili z sumiežnych dziaržaŭ (Rasii, Polščy, Litvy, Ukrainy) mabilnyja telefony, jakija ŭ nastupnym realizoŭvali praź internet-mahaziny.
Padčas pravierki finansavaj milicyjaj kanfiskavana amal 400 telefonaŭ na 1,2 młrd. rubloŭ, bo na ŭvieś zaviezieny tavar adsutničali dakumienty, jakija paćviardžali b lehalnaść nabyćcia, zachoŭvańnia i transparciroŭki.
U adpaviednaści z artykułami 12.17, 12.35 Kodeksa ab administracyjnych pravaparušeńniach za niezakonny ŭvoz i realizacyju tavaru praduhledžana adkaznaść u vyhladzie štrafu da 50 bazavych vieličyniaŭ z kanfiskacyjaj majomaści. Aprača prymianieńnia mier administracyjnaj adkaznaści razhladajecca pytańnie ab raspačynańni ŭ dačynieńni da vinavatych asob kryminalnaj spravy pa art. 233 KK Respubliki Biełaruś (niezakonnaja pradprymalnickaja dziejnaść), sankcyja jakoj praduhledžvaje pazbaŭleńnie voli da siami hadoŭ z kanfiskacyjaj majomaści.
