Skulptar Hienik Łojka źviarnuŭsia da staršyni KDB Valeryja Vakulčyka z prośbaj zaniacca prablemaj prodažu miniaciurnych dziaržaŭnych ściažkoŭ Rasijskaj Fiederacyi ŭ Biełarusi.
Henik Łojka padčas pikieta, pryśviečanaha Dniu rodnaj movy.
«Šanoŭny spadar staršynia!
Apošnim časam u našaj krainie Respublicy Biełarusi pačaścilisia vypadki zamachu na dziaržaŭny suvierenitet Biełarusi. Hramadzianie krainy zaŭvažajuć to tut, to tam u kabinach hramadskaha i słužbovaha transpartu ściahi čužoj krainy RF», — piša Łojka.
Łojka navat sastaviŭ śpis aŭtobusaŭ z vaśmi punktaŭ, kiroŭcy jakich voziać u kabinach ściahi susiedniaj dziaržavy.
Henik Łojka ŭpeŭnieny, što likvidacyja takich sprobaŭ «zamachu na suvierenitet» — sprava mienavita KDB, jakoj kamitet, adnak, nie daje rady.
«A, zrešty, čamu heta ja pavinien pieraličać usie vypadki i vystupać tut u roli infarmatara ci «stukača», jak u narodzie kažuć? Dzie pilnaść adpaviednych orhanaŭ? Vyjaŭlać vypadki parušeńnia dziaržaŭnaha suvierenitetu — heta niepasredny abaviazak supracoŭnikaŭ Vašaha viedamstva, za jaki jany atrymlivajuć zarpłatu z našych padatkaŭ.
Dziaržaŭny ściah — heta nie cacka, a kankretny palityčny simvał kankretnaj dziaržavy. Publičnaje ŭžyvańnie takoha simvału čužoj dziaržavy aznačaje albo akupacyju rodnaha kraju, albo hramadska-palityčnuju akcyju, pryśviečanuju čužoj dziaržavie, na praviadzieńnie jakoj nieabchodnaja sankcyja orhanaŭ miascovaj ułady.
Moža, kamuści zdasca, što tut niama kryminału. Padumaješ, darosłyja dziadziečki zachacieli pamachać ściažočkami. Što tut zahannaha? Chaj by paciešylisia, nikomu ž nie zaminajuć. Dy adna akaličnaść nie daje mnie spakoju — roŭna za takoje ž parušeńnie zakanadaŭstva (a mienavita, za NIESANKCYJANAVANUJU hramadska-palityčnuju akcyju) asabista ja paciarpieŭ realna, na 5 sutak turmy. A było tak. Ja zachacieŭ byŭ prademanstravać svaju luboŭ da rodnaj movy. Dziela hetaha abraŭ čas — Mižnarodny dzień abarony rodnaj movy, i miesca — škoła, jakaja bolš nie nazyvajecca biełaruskamoŭnaj. Užo zranku kala škoły pilnavali kadebisty i milicyjaniery ŭ cyvilnym. Ale ja prarvaŭsia da žurnalistaŭ usiaho śvietu i paśpieŭ vykazać svoj kłopat i bol za biełaruskuju movu. Litaralna praz 15 chvilin mianie zatrymali i asudzili pa maksimumu.
A kolki jašče biełarusaŭ trapili ŭ turmy za demanstracyju lubovi da svajho rodnaha, biełaruskaha, najpryhažejšaha ŭ śviecie, bieła-čyrvona-biełaha ściahu! I ŭsio heta, ja miarkuju, dziakujučy apieratyŭnaści KDB RB. Ale dzie ž padziełasia vaša apieratyŭnaść, kali na našych vačach miesiacami (!) pad vyhladam dziciačaj hulni adbyvajucca niezakonnyja akcyi ci, navat, ja b skazaŭ, paŭzučaja akupacyja Biełarusi čužoj dziaržavaj? Ja maju na ŭvazie ściahi Rasijskaj Fiederacyi, jakija soŭvajucca pa našaj krainie ŭ kabinach hramadskaha transpartu», — piša Łojka.
Choć zajava Łojki nie spasyłajecca na kankretnyja zakony, jakija zabaraniajuć kiroŭcam raźmiaščać u kabinak svaich słužbovych ci ŭłasnych transpartnych srodkaŭ ściahi inšaj dziaržavy, Łojka vysunuŭ try kankretnyja patrabavańni:
Pa-pieršaje, likvidavać pa ŭsioj krainie niezakonnaje ŭžyvańnie simvałaŭ Rasijskaj Fiederacy.
Pa-druhoje, pakarać supracoŭnikaŭ KDB za niedahlad u svajoj słužbie, jakija dapuścili zamach na suvierenitet našaj dziaržavy i paviedamić mnie.
Pa-treciaje, paviedamić, chto arhanizavaŭ prodaž hetych ściažkoŭ.
«Ja razumieju, što handal u nas nie zabaronieny, ale takaja arhanizacyja prodažu mienavita kiroŭcam vyhladaje pravakacyjaj. Ja nie pavieru, što KDB pra heta nie viedaje, paŭtaraju, kab mianie aryštavać chapiła 15 chvilin», — kaža Łojka.
Nahadajem, što praz rasijskija ściažki, raźmieščanyja ŭ kabinach kiroŭcaŭ hramadskaha transpartu, užo adbyłasia niekalki incydentaŭ. Tak, u pačatku kastryčnika stała viadoma, što kiraŭnictva aŭtobusnaha parka №2 horada Minska pazbaviła premii kiroŭcu aŭtobusa, na jakoha paskardziŭsia Aleś Mazanik. Dyrektar aŭtaparka taksama paviedamiŭ, što z łabavoha škła aŭtobusa prybrali i biełaruski i rasijski dziaržaŭny ściah, bo heta zabaraniajecca normami "ekipiroŭki aŭtobusa". Adnak kamientatary ŭ internecie znajšli takoje pakarańnie zanadta žorstkim. Mazanik prysłuchaŭsia da prapanoŭ, i pajšoŭ na prymireńnie z kiroŭcam Vasilom Ananičam: padaryŭ tamu knihu Uładzimira Arłova i vykazaŭ hatoŭnaść kampiensavać stračanuju premiju.
A zusim niadaŭna aktyvist BCHD Aleś Kutasaŭ admoviŭsia płacić za prajezd u aŭatobusie Minsk–Kałodziščy, bo ŭ kiroŭcy na łabavym škle byŭ zamacavany rasijski ściah. Za heta na kancavym prypynku Kutasava zatrymali, advieźli ŭ pastarunak, adnak nieŭzabavie adpuścili.
Hladzi taksama: Vajna z rasijskimi ściažkami dajšła i da Mahilova
