Nabližajecca piatnica, jakaja ŭ nas užo tradycyjna stała dniom kadravych rašeńniaŭ. A ŭ krainie nie zapoŭnienaja važnaja vakansija — Dziaržsakratara Rady biaśpieki. Tut vykazvajucca samyja roznyja viersii, chto im moža być pryznačany. Samyja raspaŭsiudžanyja, što ja čuŭ, — heta Šejman i Viktar Alaksandravič. Mnie abodva padajucca małaimaviernymi.
Treciaje pryšeście Šejmana budzie aznačać, što na adnosinach ź ES Minsk pastaviŭ tłusty kryž, bo heta budzie adnaznačna kiepski sihnał dla Brusela.
Usich padazravanych va ŭdziele ŭ źniknieńni apazicyjanieraŭ pastupova pazdymali mienavita majučy na ŭvazie palapšeńnie adnosinaŭ z Zachadam. A ciapier jakraz adnaŭlajucca sproby łaviravańnia pamiž Rasijaj i Zachadam. Tamu, miarkuju, što čas Šejmana jašče nie nadyšoŭ. Chacia jon adzin ź niamnohich, kamu Łukašenka daviaraje i chto moh by zaniać pasadu Dziaržsakratara.
Viktar Alaksandravič. Biezumoŭna, toje było b duža łahična. Daradca prezidenta pa nacyjanalnaj biaśpiecy, nazapasiŭ dośviedu na hetaj pasadzie, faktyčna kuryruje siłavyja struktury, karystajecca davieram baćki. Ale: Dziaržsakratar Rady Biaśpieki — pasada palityčnaja, i pryznačeńnie na jaje syna budzie ŭspryniata biez razumieńnia. I Zachadam, i namienkłaturaj, i elektaratam. Heta ŭžo peŭnaja zajaŭka na pierajemnaść. A ŭ nas usio ž nie Azierbajdžan i nie Čačnia. Dyj situacyja palityčnaja pakul što dazvalaje ŭstrymlivacca da takich krokaŭ.
Kamu jašče možna davieryć takuju pasadu?
Andrej Kabiakoŭ. Amal svajak prezidenta, prachodzić harniła kiraŭnika AP, praź jakoje taksama kaliści prajšli Dziaržsakratary Šejman, Niavyhłas i Łatypaŭ. Ale da biaśpieki mieŭ nievialikaje dačynieńnie. Hety chutčej pojdzie na premjerskuju pasadu, paśla taho, jak ŭrad Miaśnikoviča nie vykanaje prahnoznyja pakazčyki.
Dalej: pahrancy Vakulčyk, Zajcaŭ, Račkoŭski. Kali ŭ apošnich dvuch jašče nie skončyŭsia «termin adstoju» paśla skandalnych padziejaŭ, ź jakimi byŭ źviazany ich adychod u cień, to pieršy, niahledziačy na toje, što byŭ pastaŭleny kiravać KDB nie tak daŭno, moža stać novym Dziaržsakratarom, uličvajučy, što łaŭka zapasnych u prezidenta nadta karotkaja. A Valer Paŭłavič zarekamiendavaŭ siabie z najlepšaha boku i ŭ AAC, i ŭ Śledčym kamitecie. I ź siłavikoŭ znoŭ-taki.
Nu i zastałasia ciomnaja łašadka - kiraŭnik słužby biaśpieki prezidenta Andrej Uciuryn. Asoba niepubličnaja i małaviadomaja. Ale biezumoŭna ŭ daviery ŭ Łukašenki. Dyj historyja pakazvaje, što taki precedent užo byŭ, kali Jury Žadobin pierajšoŭ na pasadu Dziaržsakratara Rady sa słužby biaśpieki (praŭda amal hod pabyŭšy hałoŭnym čekistam krainy).
Ale ŭsio ž vialikaja imaviernaść, što z novym Dziaržsakratarom budzie jak kaliści z Rumasam, jaki źbiraŭsia ŭ Nacbank, a prezident vyrašyŭ, što być jamu vice-premjeram pa ekanomicy.
