2 listapada Maks Korž stanie pieršym biełaruskim vykanaŭcam, jaki źbiare «Minsk-Arenu».
«Naša Niva» sabrała piać faktaŭ pra śpievaka, jakoha nazyvajuć budučyniaj biełaruskaj muzyki.
Naradziŭsia ŭ Łunincy
Maks Korž naradziŭsia ŭ Łunincy, skončyŭ miascovy licej, pra što nieadnarazova ŭzhadvaje ŭ svaich pieśniach. Što cikava, u adroźnieńni ad šmatlikich biełaruskich pop-vykanaŭcaŭ, jon nikoli nie admaŭlaŭ svajho pachodžańnia, i navat padkreślivaŭ jaho – na apošnim albomie vykanaŭcy jość sempł ź biełaruskamoŭnaj abviestkaj ź minskaha tralejbusa.
Biełaruskamoŭny
Maks Korž pačynaŭ jak biełaruskamoŭny repier u hurcie LunClan.
Niahledziačy na toje, što abodva albomy Karža ruskamoŭnyja, pa jahonych słovach, ź biełaruskamoŭnaj muzyki jon nikudy nie sychodziŭ: prynamsi, u pačatku hoda jon abiacaŭ vypuścić niekalki pieśniaŭ pa-biełarusku, jakija zachavalisia jašče z časoŭ LunClan.
Artyst najvialikšaha łejbła
Śpiavak pracuje z łejbłam Respect Production. Heta adzin z najbujniejšych u Rasii łejbłaŭ, jaki zajmajecca rep-muzykaj. Zasnavalniki – hurt «Kasta», najpapularniejšaja chip-chop-farmacyja na terytoryi SNH. Heta paspryjała šyrokaj raskrutcy Maksa Karža, a taksama jahonaj pieramozie na StreetAwards u naminacyjach «Artyst hoda» i «Klip hoda».
Sprečnaja tvorčaść
Jašče z časoŭ alboma «Životnyj mir» sprečki vakoł tvorčaści Maksa Karža nie ścichajuć – ci možna nazavać jaho sapraŭdnym muzykaj, ci jahonyja teksty vytrymlivajuć krytyku?
Niekatorych vielmi razdražniaje vialikaja kolkaść słenhu i «hopnickaj» leksiki. Dajšło da taho, što z ruskaj Vikipiedyi artykuł «Maks Korž» vydalali šeść razoŭ, «praz adsutnaść značnaści».
Ruch napierad
Tym nie mienš Maks Korž nie źbirajecca spyniacca – jahonaja apošniaja kružełka za dźvie hadziny źbiraje try tysiačy łajkaŭ u internecie i robicca samym papularnym relizam hoda.
2 listapada na kancercie ŭ «Minsk-Arenie» budzie anšłah, arhanizatary ŭžo zapłanavali nastupny vystup Karža – nastupnym razam na pačatku viasny, u «pamiaškańni troški mienšym, adnak taksama prestyžnym».
