HA «Biełaruskaja asacyjacyja žurnalistaŭ» zaklikała rasijskija ŭłady vyzvalić fatohrafa Dzianisa Siniakova, paviedamlaje BiełaPAN.
Pad adpaviednym zvarotam padpisalisia bolš čym 70 biełaruskich žurnalistaŭ.
2 kastryčnika pradstaŭniki BAŽ pasprabavali pieradać hety zvarot pradstaŭnikam pasolstva Rasii ŭ Biełarusi, adnak, jak paviedamlaje pres-słužba arhanizacyi, jaho admovilisia pryniać, i parekamiendavali prysłać dakumient pa pošcie.
BAŽ vykazała škadavańnie, što «mierkavańnie viadomych biełaruskich žurnalistaŭ nie zacikaviła aficyjnych pradstaŭnikoŭ pasolstva RF», i vykazała nadzieju na najchutčejšaje vyzvaleńnie Siniakova.
U svaju čarhu savietnik pasolstva Rasii Uładzimir Marčukoŭ, jaki znosiŭsia z pradstaŭnikami BAŽ, skazaŭ u hetaj suviazi BiełaPAN, što ŭsia karespandencyja prymajecca ŭ pasolstva «aficyjnym šlacham pa pošcie».
«Čym BAŽ adroźnivajecca ad orhanaŭ dziaržaŭnaj ułady abo inšych pasolstvaŭ? Usie prysyłajuć poštaj. Kali pryjdzie hety zvarot. jon budzie aficyjna zarehistravany», — adznačyŭ dypłamat.
Fatohraf Dzianis Siniakoŭ byŭ zatrymany 19 vieraśnia, kali zdymaŭ akcyju aktyvistaŭ «Hrynpis» u Piačerskim mory.
Ekipaž sudna Arctic Sunrise sprabavaŭ zamacavać na naftavaj płatformie «Pryrazłomnaja» płakat u znak pratestu suprać zdabyčy vuhlevadarodaŭ u Arktycy.
U «Hrynpis» śćviardžajuć, što znachodzilisia ŭ mižnarodnych vodach i ŭ 500-mietrovuju zonu vakoł płatformy nie ŭvachodzili. Na borcie zatrymanaha sudna znachodziłasia 30 čałaviek z 19 krain.
Pa rašeńni Leninskaha rajonnaha suda Murmanska ŭsie jany, u tym liku Siniakoŭ, uziatyja pad vartu da 24 listapada. Śledčy kamitet Rasii raspačaŭ kryminalnuju spravu pa artykule «piractva, učynienaje arhanizavanaj hrupaj».
Ciapier Siniakovu pahražaje termin da 15 hadoŭ pa artykule «piractva». Arhanizatary akcyi ŭžo zajavili, što fatohraf nie pavinien nieści adkaznaść za toje, što jon zdymaje.
