U pačatku kastryčnika ŭ internecie adbudziecca premjera supolnaha muzyčnaha prajekta «Apošni zołak», udzielniki jakoha vystupajuć za spynieńnie praktyki śmiarotnaha pakarańnia ŭ Biełarusi.
Stali viadomyja novyja padrabiaznaści supolnaha prajekta biełaruskich muzykaŭ pad nazvaj «Apošni zołak». Składanka, jakaja najbližejšym časam źjavicca ŭ siecivie, pryśviečana śmiarotnamu pakarańniu. Abiacałasia, što kožny ź siami muzykaŭ praśpiavaje pieśniu pra toj ci inšy sposab ździajśnieńnia «najvyšejšaj miery».
U vyniku, Lavon Volski zaśpiavaje pra ŭkryžavańnie, Alaksandr Pamidoraŭ pra hazavyja kamiery, Hanna Chitryk pra hiljacinu, Aleś Dzianisaŭ pra rasstreł, Viktar Rudenka pra atrutu, Źmicier Vajciuškievič pra šybienicu, a Nasta Špakoŭskaja pra elektryčnaje kresła.
Muzykaŭ, što ŭziali ŭdzieł u prajekcie, abjadnoŭvaje nieprymańnie śmiarotnaha pakarańnia, i taho fakta, što Biełaruś stała apošniaj krainaj Jeŭropy, dzie śmiarotnaje pakarańnie dahetul nie admienienaje.
«Fakt u tym, što z-za adnaho drennaha čałavieka moža zahinuć niechta całkam nievinavaty. Luby z nas. Dla mianie heta hałoŭnaje», — kaža Alaksandr Pamidoraŭ.
Lavon Volski pierakanany što navat samy złosny złačyniec musić mieć prava ŭśviadomić ciažkaść zroblenaha i pakajacca. «U hetym sensie pažyćciovaje źniavoleńnie ŭ vypadku asabliva ciažkaha złačynstva budzie bolš słušnym pakarańniem », — adznačaje jon.
Prajekt «Apošni zołak» prymierkavany da Suśvietnaha dnia baraćby suprać śmiarotnaha pakarańnia, jaki adznačajecca 10 kastryčnika. Z 1997 hoda Jeŭropa de-fakta źjaŭlajecca prastoraj, volnaj ad śmiarotnaj kary.
Tranślacyju žyvoj premjery prajekta "Apošni zołak" hladzicie na NN.BY u subotu, 5 kastryčnika, a 19.00.
