Trykatažnaje pradpryjemstva AAT «KIM» (Viciebsk) moža być dałučana da viciebskaha AAT «Śvitanak». Pra heta zajaviŭ prem'jer-ministr Michaił Miaśnikovič 16 lipienia padčas naviedvańnia viciebskaha pradpryjemstva.
Jak paviedamlaje pres-słužba ŭrada, zaraz AAT «KIM» źjaŭlajecca stratnym i ŭstojliva niepłaciežazdolnym z-za faktyčnaha poŭnaha znosu abstalavańnia, nizkich abjomaŭ vytvorčaści, značnych daŭhavych abaviazacielstvaŭ i niedachopu abarotnych srodkaŭ, što nie dazvalaje svoječasova zakuplać syravinu, farbavalniki, chimikaty, raźličycca za enierharesursy.
«Vyjście z takoj situacyi kiraŭnictva pradpryjemstva bačyć u akazańni AAT „KIM“ dadatkovych mier dziaržaŭnaj padtrymki, źviazanych z vydzialeńniem kredytaŭ na techničnaje pieraasnaščeńnie i restrukturyzacyjaj zapazyčanaści pa płaciažach. Adnak heta prapanova nie znajšła padtrymki ŭ prem'jer-ministra», — havorycca ŭ paviedamleńni pres-słužby.
«Nielha viečna žyć za čužy košt», — padkreśliŭ Miaśnikovič. Jon zaznačyŭ, što pradpryjemstvu try razy akazvali dapamohu, adnak efiektu hetyja miery nie prynieśli
— pradukcyja pradpryjemstva pradajecca słaba, na rynku sa svajoj nišy jaho značna paciaśnili inšyja vytvorcy.
«Pradpryjemstva, jak i žyvy arhanizm, nie moža isnavać viečna. Jaho treba ci abnavić, ci likvidavać»,
— dadaŭ prem'
jer-ministr padčas abmierkavańnia roznych varyjantaŭ adnosna dalejšaha losu AAT «KIM». Vyjście ŭ hetym vypadku jon bačyć u kaapieracyi viciebskaha pradpryjemstva z AAT «Svitanak», u jakoha jość raźvitaja tavarapravodnaja sietka, uzory zapatrabavanaj pradukcyi, i stvareńni na bazie apošniaha trykatažnaha chołdynhu. «Pradpryjemstvam treba stvarać chołdynhi — trykatažny, abutkovy i hetak dalej. I tady ŭ adnych rukach buduć abjadnanyja kadry, adzinaja techničnaja palityka, padychod da pracy, budzie ahulnaja cikavaść», — upeŭnieny Miaśnikovič.
AAT «KIM» śpiecyjalizujecca na vytvorčaści trykatažnych i pančošna-škarpetkavych vyrabaŭ dla ŭsich uzrostavych hrup nasielnictva. Dola dziaržavy ŭ statutnym fondzie tavarystva składaje 99,76%. Za pieršaje paŭhodździe 2013 hoda pradpryjemstva vypuściła pradukcyi na 42,2 młrd. rubloŭ, abo 86,8% da anałahičnaha letašniaha ŭzroŭniu. Vytvoryja mahutnaści za studzień-červień pa vypusku pančošna-škarpetkavych i trykatažnych vyrabaŭ zahružanyja na 27% i 52,4% adpaviedna. Reštki hatovaj pradukcyi skłali 180,4% siaredniamiesiačnaha abjomu vytvorčaści.
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
