U studzieni—mai 2013 hoda rehijony Biełarusi nie dasiahnuli prahnoznych tempaŭ ekanamičnaha rostu, havorycca ŭ ahladzie, jaki padrychtavała Ministerstva ekanomiki.
"U studzieni—mai 2013 hoda ŭstanoŭleny prahnozam uzrovień ekanamičnaha rostu nie dasiahnuty ni adnym ź siami rehijonaŭ (majucca na ŭvazie vobłaści i horad Minsk. — BiełaPAN.). Pry hetym abjom vałavoha rehijanalnaha praduktu (VRP) u paraŭnańni z adpaviednym letašnim pieryjadam źniziŭsia ŭ supastaŭnych cenach u Viciebskaj i Mahiloŭskaj abłaściach, a taksama horadzie Minsku. Va ŭsich rehijonach adznačajecca dalejšaje zapavolvańnie tempaŭ rostu vałavoha rehijanalnaha praduktu", — kanstatujuć śpiecyjalisty Ministerstva ekanomiki.
Pavodle źviestak Minekanomiki, adsutnaść pryrostu VRP u Viciebskaj vobłaści ŭ asnoŭnym źviazana sa źmianšeńniem abjomaŭ aptovaha tavaraabarotu pradukcyi naftachimii, u Mahiloŭskaj — skaračeńniem abjomu padradnych rabot. Razam z tym u Minsku adsutnaść ekanamičnaha rostu śpiecyjalisty Minekanomiki tłumačać admoŭnaj dynamikaj pracy pramysłovaści (abjom pramvytvorčaści ŭ stalicy ŭ studzieni—mai źniziŭsia na 17,8% u paraŭnańni z anałahičnym letašnim pieryjadam).
Varta zaznačyć, što razam ź nievykanańniem prahnoznych pakazčykaŭ nazirajecca zapavolvańnie tempaŭ ekanamičnaha rostu va ŭsich rehijonach Biełarusi.Tak, u Bresckaj vobłaści temp rostu VRP u studzieni—mai ŭ paraŭnańni ź pieršym kvartałam hetaha hoda źniziŭsia na 2,3 pracentnaha punktu, u Viciebskaj — na 1 p.p., u Homielskaj — na 0,9 p.p., u Hrodzienskaj — na 1,5 p.p., u Minsku — na 2,2 p.p., u Minskaj vobłaści — na 4,2 p.p., u Mahiloŭskaj — na 2,3 p.p.
Miž tym, niahledziačy na zapavolvańnie tempaŭ ekanamičnaha rostu (u studzieni—mai rost VUP u Biełarusi skłaŭ 1,1% pry hadavym prahnozie 8,5%) urad stavić zadaču vykanać daviedzienyja prahnoznyja pakazčyki na hety hod.
"Prašu nie tracić čas na razvažańni pra toje, što zadańni i zadačy budzie ciažka vykanać. Tak, składana, ciažka, ale treba. I rabić heta nie dziela ličbaŭ spravazdačy, a dla raźvićcia ekanomiki, jakaja zabiaśpiečvaje dabrabyt našaj krainy i jaje hramadzian", — zajaviŭ Michaił Miaśnikovič padčas pasiadžeńnia ŭrada, jaki adbyŭsia 14 červienia.
