Departacyja 19-21 červienia 1941 hoda, abo Pra što treba pamiatać bieraściejcam 11

Pamiatajučy strašnuju datu pačatku vajny 22 červienia 1941 hodu, nam, bieraściejcam, jak i mnohim inšym žycharam Zachodniaj Biełarusi, varta pamiatać pra nia mienš trahičnyja dni napiaredadni — departacyi 19–21 červienia 1941-ha.

Z 19 pa 21 červienia 1941 hodu 132-i kanvojny bataljon NKVD ź Bieraściejskaj krepaści vykonvaŭ važnaje zadańnie balšavickaj partyi — kanvajavańnie ŭ HUŁAH troch ešałonaŭ z «vorahami narodu» z turmaŭ u Bieraści, Baranavičach i Pinsku. Viadoma, što ešałony z našymi viaźniami-ziemlakami ź Bieraścia tady hnali va Unženski papraŭča-pracoŭny łahier, da stancyi Suchabiazvodnaje Horkaŭskaj vobłaści.

Heta była čaćviortaja, apošniaja pieradvajennaja chvala departacyjaŭ. Na hety raz achviarami departacyi stali členy siemjaŭ «vorahaŭ narodu» — pieravažna žančyny i dzieci. Ich vieźli na lesapavał u HUŁAH… Z BSSR (pieravažna z Zachodniaj Biełarusi) tady było vyvieziena dla «pieravychavańnia» 24.412 čałaviek.

Varta adznačyć i jašče adno, mabyć samaje važnaje zadańnie 132-ha kanvojnaha bataljonu ź Bieraściejskaj krepaści napiaredadni napadu hitleraŭskaj Hiermanii. 21 červienia 1941 h. a 23.50 hadz., kali ŭ horadzie ŭžo va ŭsiu dziejničali niamieckija dyviersanty i faktyčna była pierarvana suviaź, kanvoj 132-ha bataljonu NKVD adpraviŭsia z čyhunačnaj stancyi Bieraście, vykonvajučy płanavy maršrut N 104 «Bieraście-Maskva-Bieraście» (uviedzieny z 27 śniežania 1940 h.). Jon ažyćciaŭlaŭ kanvajavańnie ŭ Maskvu śpieckantynhientu…

Z savieckich časoŭ usio viedajuć nadpis, pakinuty adnim z abaroncaŭ Bieraściejskaj krepaści: «Umiraju, no nie sdajuś! Proŝaj Rodina! 20.VII.41h.», Ale mała chto viedaje, što hety nadpis byŭ zrobleny na ścianie kazarmy 132-ha asobnaha bataljona kanvojnych vojskaŭ NKVD SSSR…

A voś hety, niadaŭna abnoŭleny pamiatny znak u Bieraściejskaj krepaści z šmatlikimi viankami (hł. fota) ŭłasna ŭ honar tych «doblesnych» voinaŭ-kanvairaŭ NKVD, jakich pa-za krepaściu, u samim Bieraści, sami razumiejecie, ničoha dobraha nie čakała…

Pakazalna, što ŭ tekście na novaj šyldzie słova «kanvojny» prapuščana. Zrešty, i biaz hetaha tekst jaje adyjozny dla čałavieka, jaki choć troški myślić: «Zdieś v ijunie 1941 hoda hieroičieski sražaliś s fašistskimi zachvatčikami voiny 132-ho otdielnoho batalona vojsk NKVD. Viečnaja słava hierojam»…

0

0

0

0

0

0

Ihar Baranoŭski, jacviah.livejournal.com

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH