Michaił Šaramiet byŭ vialikim amataram pachodaŭ.
Siabry Michała Šaramieta raskazali, što pryčynaj jahonaj śmierci stała atručvańnie raślinaj cykutaj.Michaił byŭ zaŭziaty turyst. Na hety raz u składzie turystyčnaj hrupy ź siami čałaviek jon byŭ u bajdaračnym pachodzie na Naračanskich aziorach.
Ad junactva Šaramiet zachaplaŭsia vandroŭkami, udzielničaŭ u spartova-patryjatyčnych arhanizacyjach moładzi. Jaho cikaviła ekstremalnaje vyžyvańnie, hetamu jon vučyŭ i moładź u pachodach.
Zdarałasia, jon jeŭ liściki j kareńčyki. Imavierna, hetym razam jon zbłytaŭ kalivy cykuty z pažyŭnaj raślinaj siamiejstva parasonavych — śnitkaj.U Miadzielskim RAUS «Našaj Nivie» paćvierdzili, što vypadak atručvańnia cykutaj byŭ zafiksavany.
U Šaramieta zastalisia žonka i čatyrochhadovy syn Aleś.Spačuvańni ŭdavie Michała, redaktarcy sajta Tut.by Alonie Andrejevaj-Šaramiet, učora vykazaŭ były staršynia Maładoha Frontu, palitźniavoleny Pavieł Sieviaryniec.
«Michał Šaramiet treniravaŭ maładafrontaŭskuju družynu, časta jeździŭ na vyškały, — raskazvaje Sieviaryniec.— Jon u svoj čas zasnavaŭ spartova-patryjatyčnuju arhanizacyju «Vajar» pry Maładym froncie. Maŭklivy, ale tałkovy chłopiec. Achoŭvaŭ paradak, słuchalisia jaho ŭsie. Vidać, nabłytaŭ niešta, nie toje źjeŭ…»
U Małady front Šaramiet pryjšoŭ školnikam naprykancy 1990-ch.Hetaha bialavaha chłopca z adkrytym tvaram pamiatajuć mnohija ŭdzielniki manifiestacyj toj pary. U 2004 hodzie, paśla taho jak MF raździaliŭsia na frakcyi, jakija časam burna supierničali miž saboj. Šaramiet stvaryŭ novuju moładzievuju arhanizacyju arhanizacyju pad nazvaj «Volnaja moładź». Pa słovach tahačasnaha MFaŭca Cimocha Drančuka, jana «mieła spartova-patryjatyčnuju nakiravanaść i była blizkaj pa pohladach Maładoha frontu». Arhanizacyja nie stała šmatlikaj, ale brała aktyŭny ŭdzieł u Płoščy 2006 hoda. Jaje siabry źbirali podpisy za Alesia Michaleviča padčas prezidentskaj kampanii 2010 hoda. Supołki «Volnaj moładzi» Ukantakcie nie abnaŭlalisia ŭžo praciahły čas, a sajt arhanizacyi nie pracuje.
Viadoma, što Šaramieta zatrymlivali padčas Džynsavaha festu 2006 hoda, a taksama pavodle spravy ab vybuchu 3 lipienia 2008 hoda — tady śpiecsłužby masava chapała aktyvistaŭ dziejnych i byłych vajskova-patryjatyčnych supołak.
Pracavaŭ Šaramiet u Ministerstvie pa nadzvyčajnych situacyjach. Jon uvohule zaŭždy lubiŭ ekstrym: navat bieł-čyrvona-biełyja ściahi vyviešvaŭ na samych niedastupnych miescach.«Michaił byŭ dobry i ŭparty chłopiec, i kali mnohija abmiarkoŭvali, jon rabiŭ. Jaho hibiel — sapraŭdy vialikaja strata», — skazaŭ «Našaj Nivie» Cimoch Drančuk.
Pa-biełarusku cykutu jadavituju nazyvajuć jašče «vixah šalej».Heta nadzvyčaj atrutnaja raślina, jakaja šyroka raspaŭsiudžana amal va ŭsim śviecie. Taksičnymi źjaŭlajucca ŭsie častki raśliny, ale najbolšaja kancentracyja jadu cykutaksinu nazirajecca ŭ kareńni. Dadatkovuju niebiaśpieku stvaraje toje, što cykuta maje pryjemny pach morkvy, a atrutnaje kareńnie na smak nahadvaje bručku ci redźku.
Zhodna ź lehiendaj ličyłasia, što hrečaski fiłosaf Sakrat byŭ pakarany pryniaćciem soku cykuty.
Suprać jaje niama procijadździa, raskazvaje staršy navukovy supracoŭnik Instytuta ekśpierymientalnaj bataniki NAN Biełarusi Arkadź Skuratovič:«U Biełarusi jość dźvie śmiarotnyja raśliny — heta cykuta i balihałoŭ. Dziejničajuć jany vielmi padobna, paražajuć centralnuju niervovuju sistemu. Raście cykuta la vady: na rekach, bałotach, ručajach. Jana ŭsia atrutnaja: i liście, i kareńnie. Pa karaniach jaje i adroźnivajuć. U jaje vielmi vialikaje, z kułak, karniavišča. Kali razrezać, to tam budzie jak 5-7 asobnych pustych kamier. A tak jana vielmi mała adroźnivajecca ad inšych raślin siamiejstva parasonavych.
Jość inšyja atrutnaja raśliny, ale jany vyklikajuć tolki hałaŭny bol, dyjareju, a tut dastatkova źjeści dva-try listočki, kab zahinuć».
0
0
0
0
0
0
