Michaił Kučuk: cyrulnik, jaki pierakładaje filmy 10

Michał Kučuk vykłaŭ na svajoj staroncy «Ukantakcie» ahučany pa-biełarusku film «Habit: niečakanaje padarožža». «Habit — heta chobit. Ale tak bližej da aryhinalnaha anhlijskaha vymaŭleńnia», — tłumačyć pierakładčyk karespandentu NN.

Film pavodle Tołkina — užo treciaja pierakładzienaja i ahučanaja Kučukom pa-biełarusku stužka.

Raniej byli «Miljanier z truščobaŭ» i «Avatar».

Michał rodam z Baranavič, jon nie fiłołah i nie linhvist. Žyvie ŭ Maskvie i pracuje cyrulnikam.

Sabralisia i pajechali ŭ Maskvu

«My z bratam Aleham pryjechali ŭ Maskvu hadoŭ piać tamu, — raskazvaje jon. — Prosta sabralisia i pajechali. Ja na cyrulnika vučyŭsia ŭ Minsku, a ŭ Maskvie tolki padvyšaŭ kvalifikacyju. Ja ŭniviersalny cyrulnik — i mužčynski, i žanočy. Brat — taksama cyrulnik, jon u Maskvie vučyŭsia. Pracujem ź im u sałonie».

Pačałosia z «Karala Lva»

Adkul cikavaść da pierakładaŭ? Heta pačałosia hadoŭ z šaści-siami, kaža Michał:

«Pieršym filmam, jaki zachaciełasia pierakłaści, byŭ mulcik „Karol Leŭ“. Ja ŭpieršyniu hladzieŭ jaho pa-italjansku…

Uvohule, za žyćcio daviałosia šmat pajeździć, los tak skłaŭsia — žyŭ za miažoju. U asnoŭnym, u skandynaŭskich krainach. Čamu? Nie chaču raskazvać, heta pryvatnyja rečy».

Paźbiahać rasiejskich słovaŭ

Pierakładać filmy na biełaruskuju movu Michał pačaŭ u Maskvie. Spačatku byŭ spažyviecki intares:

«Pačaŭ šukać filmy pa-biełarusku, kab hladzieć, a ich nie było».

25-hadovy Michał naležyć da pakaleńnia, jakoje pačynała vučycca ŭ biełaruskich škołach:

«Ja pajšoŭ u škołu ŭ 94-m, tady jašče ŭsie išli ŭ biełaruskamoŭnyja kłasy.

Ja i skančaŭ biełaruski kłas».

Pierakładajučy, ja starajusia paźbiahać słovaŭ, jakija jość i ŭ rasiejskaj movie. Biełaruskaja mova, ja liču, bahataja na sinonimy. Navošta ŭžyvać rasiejskija słovy? Naprykład hnomaŭ ja nazyvaju «čyrvaludy». Heta słova ź dziacinstva — baćka takoje ŭžyvaŭ, pamiataju. Baćka sa mnoj havaryŭ pa-biełarusku.

Praščur zadušyŭ Kiejstuta

«Mnie samomu bolš daspadoby histaryčnyja stužki, — kaža Michał. — Ale ja razumieju, što pierakładać karyśniej papularnaje». Jon cikavicca historyjaj, hienieałohijaj. U Biełarusi nie tak mnoha siemjaŭ z proźviščam Kučuk, i ŭsie jany, śćviardžaje Michał, pachodziać ad pieršaprodka, jaki braŭ udzieł u zabojstvie vialikaha kniazia Kiejstuta (1382). Sapraŭdy, u chronikach, siarod inšych, fihuruje Kučuk, kamornik kniazia Jahajły.

Što chaciełasia b pierakłaści «dla siabie»? Michał adkazvaje adrazu: dakumientalnuju stužku «Dom — spatkańnie z płanietaj» Jana Arcius-Biertrana i Luka Biesona. Tam apaviadajecca pra 60 krain śvietu — pa 5 chvilin na kožnuju.

Zarobki maskoŭskich cyrulnikaŭ

«My z bratam zdymajem kvateru, trochpakajoŭku ŭ Padolsku. Heta elektryčkaj sorak chvilin da centru Maskvy. Kaštuje trochpakajoŭka 20000 rubloŭ u miesiac (kala 670 dalaraŭ — NN). Raniej zdymaŭ „adnušku“ ŭ centry Maskvy za 25000 rubloŭ (kala 830 dalaraŭ — NN). Tak, Maskva — darahi horad. Ci chapaje hrošaj na žyćcio? Žyć možna pa-roznamu, — paśmichajecca Michał. — Mnie chapaje. Zarablaju kala 2,5 tysiač dalaraŭ u miesiac».

Z časam zašlifavałasia

«Pa pieršym časie mianie možna było identyfikavać jak biełarusa — vyłučaŭ akcent, hałosnyja huki my daŭžej vymaŭlajem. Ale z časam vymaŭleńnie zašlifavałasia. Ciapier biełarusa ŭva mnie paznajuć, tolki kali sam skažu pra heta.

Ci płanuju tut zastavacca? Nie, tolki ŭ Biełaruś.

Heta pytańnie času. Źniadaŭna pačaŭ viartacca da hetaha dumkami ledź nie štodnia. Hrošy — možna zarabić u lubym miescy, a dušeŭny spakoj nie ŭsiudy znojdzieš».

Pra aŭtarskija pravy

«Kali ja pierakłaŭ «Avatar» i zakinuŭ na Jutub, videa vydalili z sajtu, uhledzieŭšy ŭ im parušeńnie aŭtarskich pravoŭ. Da «Habita…» ja dadaŭ tłumačeńnie, što stužka pierakładzienaja nie dla kamiercyjnaha karystańnia, a vyklučna ŭ adukacyjnych metach, dziela pašyreńnia ŭžytku movy. Kali ŭ adukacyjnych metach — aŭtarskija pravy nie parušajucca.

Pierakładzienyja stužki musiać być tolki ŭ volnym dostupie — heta moj pryncyp, —

kaža Kučuk. — Była prapanova studyjna zapisacca, ale čałaviek tady staviŭ umovu, što film vyjdzie niejkim abmiežavanym nakładam. Ja adrazu skazaŭ «nie».

Technałohija

«Jak adbyvajecca pieraahučka? Ja znajšoŭ sabie dobry torent-servis, dzie filmy vykładzienyja na movie aryhinału. Spampoŭvaju. U mianie na pierakład 10 chvilinaŭ filma idzie hadzina času. Mianie nichto nie vučyŭ, ja sam asvojvaŭ technałohiju zapisu, šukaŭ u internecie infarmacyju, z dapamohaju jakich prahram lepiej zapisvać huk. Praź internet kupiŭ mikrafon dla studyjnaha zapisu…

Pieraahučvaju filmy na kuchni. Začyniajusia, prašu brata, kab nie zachodziŭ, staŭlu na płanšecie film, siadaju ŭ navušnikach, słuchaju, pišu…

Paśla zvodžu razam huk i ruch — i zalivaju ŭ internet».

Nie chapaje hučańnia movy

«Kožny zdolny takoje rabić. Pamočniki tut nie treba. Choć, ja b, kaniečnie, chacieŭ, kab była niejkaja supołka, kab kaardynavacca praź internet, jakija filmy pierakładać, kab dapamahać adzin adnomu. Bo ad hetych pierakładaŭ, ja liču, jość vialikaja karyść. Heta vializny ruch dla movy. Siońnia nam nie chapaje hučańnia movy. Napisanych tekstaŭ — jašče tak-siak, u internecie ich chapaje. Ale my zabyvajem, jak naša mova hučyć.

Heta pačynałasia jak zachapleńnie, ale ciapier pierarastaje ŭ niešta bolšaje. Ja ŭžo hatovy ŭkładać ułasnyja srodki ŭ heta.

Jakoj dapamohi b chacieŭ? Kab mnie padkazali, jakija dla majoj spravy jość kampjutarnyja prahramy, jakija možna było b nabyć. Bo ja karystajusia tym, što sam znajšoŭ u internecie».

Na padychodzie robat

«Nastupny ja chaču pierakłaści mulcik pra robata Vall-i. Tak što čakajcie».

Hutaryŭ Siarhiej Mikulevič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH