Jak ja stvaryŭ biełaruskamoŭnuju supołku 13

Vyrašyŭšy vypravić heta i pravieryć, jak sučasnaja moładź stavicca da rodnaj movy, ja stvaryŭ biełaruskamoŭnuju supołku «Ukantakcie».

Nazva pavinnaja być prostaj i zrazumiełaj, i ja vybraŭ «Ja ♥ biełaruskuju movu». Vyznačyŭsia i z napaŭnieńniem: dla pačatku heta buduć cikavyja i jaskravyja zdymki peŭnych pradmietaŭ, kazačnych piersanažaŭ, žyvioł i raślinaŭ, padpisanyja pa-biełarusku. Heta musiła spryjać zapaminańniu novych biełaruskich słovaŭ u tych, chto nie karystajecca movaj štodzionna, ale chacieŭ by jaje vyvučyć.

Adrazu ja paprasiŭ paŭdzielničać u supołcy niekatorych siabroŭ. Kala 10 zacikaŭlenych čałaviek dałučylisia za adzin viečar. Što ž, niadrenna dla pačatku. Nastupny etap składaŭsia z aktyŭnaj rekłamy supołki ŭ inšych biełaruskich pablikach ź vialikaj kolkaściu ludziej. U paviedamleńni ja prasiŭ ustupać u supołku tych, chto lubić biełaruskuju movu, i prykładaŭ da jaho adno fota z supołki.

Na nastupny dzień ja byŭ vielmi ździŭleny tym, što kolkaść udzielnikaŭ pavialičyłasia da sotni. Ale samaje hałoŭnaje — ludzi pačali stavić šmat łajkaŭ i raskazvać pra zapisy supołki na svaich staronkach! Natchniŭšysia takim pačatkam, ja z padvojenaj enierhijaj pačaŭ raskručvać hrupu — za tydzień jana naličvała ŭžo kala 300 čałaviek.

Naviedvalnaść rasła, łajkaŭ i kamientaroŭ źjaŭlałasia ŭsio bolš.

Praz 10 dzion, da svajho ździŭleńnia, ja zaŭvažyŭ, što pra maju hrupu źjaviŭsia artykuł na sajcie telekanała «BiełSat», jaki paźniej raźmiaściła i hazieta «Naša Niva». Pra takuju papularnaść ja moh tolki maryć!

Dziakujučy hetamu pra supołku daviedałasia jašče bolš ludziej, i za sutki dałučyłasia bolš za 200 čałaviek! Na dadzieny momant za miesiac isnavańnia ŭ hrupie naličvajecca kala 1500 udzielnikaŭ, ale samaje cikavaje — zvarotnaja suviaź: jany vielmi aktyŭna abmiarkoŭvajuć mnohija zapisy, spračajucca pra pierakład niekatorych słovaŭ, zachaplajucca biełaruskim varyjantam pierakładu i pačali sami prapanoŭvać svaje fota ź cikavymi słovami pa-biełarusku.

Treba dadać, što takich supołak źjaŭlajecca ŭsio bolš. Niekatoryja, naprykład, majuć bolš za sotniu tysiač udzielnikaŭ. Voś najbolšyja ź ich:

Lit.bel (101 000 udzielnikaŭ)

Biełaruskija rahatulki | Komiksy (15 600 udzielnikaŭ)

Žarty pa-biełarusku (8 800 udzielnikaŭ)

Pa-biełarusku (5200 udzielnikaŭ)

Ja maru… (2 000 udzielnikaŭ)

Biełaruskaja mova (3200 udzielnikaŭ)

Biełorusskij jazyk | Biełaruskaja mova (3800 udzielnikaŭ)

Biełaruski dematyvatar (3250 udzielnikaŭ)

Sapraŭdnaja biełaruskaja łajanka, CHREN TABIE Ŭ VOČY! (2400 udzielnikaŭ)

Jak vyjaviłasia, moładź nie adviarnułasia ad biełaruskaj havorki: varta tolki padać rodnuju movu jak-niebudź niestandartna, jarka (choć by ŭ formie pryhožych malunkaŭ, padpisanych pa-biełarusku), i jana budzie imkliva nabirać papularnaść. I dapamahčy hetamu moža luby čałaviek navat praz svaju staronku ŭ sacyjalnaj sietcy.

Što da mianie, to stvareńniem supołki ja nie abmiežavaŭsia i zrabiŭ adziny ŭ Biełarusi sajt pra anhlijski futboł na biełaruskaj movie, jaki tolki-tolki pačaŭ nabirać papularnaść i pra jaki ŭžo paśpieła napisać «Naša Niva».

Ihar Łosik, intex-press.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH