Siarhiej Darafiejeŭ atrymaŭ hałoŭnuju žurnalisckuju premiju Ukrainy 14

U Kijevie na vychodnych adbyłasia cyrymonija ŭznaharodžańnia najlepšych televizijnych prajektaŭ i viadučych XII ukrainskaj premijaj «Teletryumf». U naminacyjach byli pradstaŭleny nie tolki telesieryjały, akciory, tok-šou, telepieradačy i ich viadučyja, ale i ludzi, jakija zastajucca pa-za kadram: režysiory, pradziusary, dyzajniery.

Najlepšaj infarmacyjnaj prahramaj pryznanyja «Padrabiaznaści» (telekanał Inter), infarmacyjna-analityčnaj prahramaj — TSN. Tiždień (telekanał 1+1).

U naminacyi «Intervjujer» premija dastałasia biełaruskamu žurnalistu Siarhieju Darafiejevu,

jaki viadzie subotniuju prahramu «Partrety ź Siarhiejem Darafiejevym» na 5-m ukrainskim kanale (www.5.ua).

***

Siarhiej Darafiejeŭ — biełaruski žurnalist. Pracavaŭ na ONT, vioŭ tok-šou «Vybar», byŭ zvolnieny paśla 19 śniežnia 2010 h., kali ŭ noč paśla vybaraŭ zadaŭ u pramym efiry kiraŭničcy CVK Lidzii Jarmošynaj niekalki niepryjemnych pytańniaŭ, paśla čaho taja śpiešna pakinuła studyju.

Taksama Darafiejeŭ paprasiŭ čynoŭnikaŭ patłumačyć hledačam, čamu nielha viečaram vychodzić na płošču, abo čamu nie dapuścili pradstaŭnikoŭ apazicyi dziažuryć nočču na vybarčych učastkach razam ź milicyjaj.

Niezadavalnieńnie Darafiejevym 20 śniežnia 2010 h. vykazaŭ Łukašenka padčas svajoj pres-kanfierencyi, nazvaŭšy taho «maładym žurnalistam». Darafiejeŭ nieŭzabavie byŭ zvolnieny.

Praź niekatory čas staŭ pracavać na ŭkrainskim 5-m kanale, dzie viadzie štosubotniuju prahramu «Partrety» ź Siarhiejem Darafiejevym», a taksama razam ź inšymi žurnalistami štodzionnuju viečarovuju prahramu «Čas. Pidsumki dnia».

nn.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH