Трох з чацвярых удзельнікаў беларускага рок-гурта Nizkiz затрымалі ў Магілёве, паведаміў міліцэйскі тэлеграм-канал.
Музыкі заставаліся ў Беларусі, нягледзячы на рэпрэсіі. Яны перыядычна выязджалі за мяжу граць канцэрты, але вярталіся.
Затрыманыя вакаліст і аўтар песень Nizkiz Аляксандр Ільін, бас-гітарыст Сяргей Кульша і бубнач Дзмітрый Халяўкін.
Песня Nizkiz «Правілы» стала хітом у 2020 годзе. Кліп на яе хутка сабраў больш за мільён праглядаў. Яго знялі на маршах пратэсту ў Мінску.
Увосень музыкі рагачоўскага гурта Tor Band былі асуджаныя на тэрміны ад 8 да 10 гадоў за свае песні.
Масавыя палітычныя рэпрэсіі ў Беларусі працягваюцца з 2020 года, калі выбары суправаджаліся нерэгістрацыяй і арыштамі праціўнікаў Лукашэнкі і назіральнікаў на выбарчых участках. Нягледзячы на гэта, Аляксандр Лукашэнка, мяркуючы са звестак з участкаў, дзе выбарчыя камісіі дазволілі назіральнікам сачыць за падлікам галасоў, прайграваў Святлане Ціханоўскай, але не аддаў улады.
З 2022 года, пасля нападу Расіі на Украіну, беларусаў пачалі пераследаваць і за антываенныя выказванні або сімпатыі да Украіны.
За гэты час у краіне адбылося не менш за 50 тысяч палітычна матываваных затрыманняў.
Чытайце таксама:
