Фота: выратавальныя службы Італіі
Ля вострава Карчэлі, які ўваходзіць у архіпелаг Ла-Мадалена каля паўночна-ўсходняга ўзбярэжжа Сардзініі, у выніку крушэння свайго паруснага судна загінуў беларус. Пра гэта піша сайт «Беларусь і свет» са спасылкай на мясцовыя італьянскія СМІ.
Удакладняецца, што наш суайчыннік прыплыў да Ла-Мадалена з камуны Порта-Торэс, якая размяшчаецца на Сардзініі, на лодцы са шклапластыка даўжынёй каля 10 метраў.
Відаць, у суботу 4 лістапада мужчыну заспела знянацку рэзкае пагаршэнне надвор'я і стану мора. Увечары ад яго паступіла па тэлефоне просьба аб дапамозе.
Адразу пачаліся ўскладненыя неспрыяльнымі ўмовамі пошукі, у тым ліку верталётамі. Паралельна рабіліся спробы звязацца, але тэлефон ужо маўчаў.
У нядзелю 5 лістапада ля скалістага берага Карчэлі былі знойдзеныя абломкі цалкам разбуранага судна і нежывое цела. З мора яго дасталі вадалазы.
Зараз ідзе расследаванне трагічнага здарэння. Высвятленнем усіх абставінаў гібелі займаецца пракуратура горада Тэмп'я-Паўзанія.
Чытайце таксама:
У Нямеччыне ў лагеры для бежанцаў памёр 48-гадовы беларус
«За два дні да таго званіў брату». Што здарылася з палітвязнем, якога знайшлі мёртвым у Рызе
