Замак Мальмёхус на поўдні Швецыі. Здымак, загружаны ўкраінкай Кацярынай Байдужай, трапіў у лік пераможцаў конкурсу ў 2022 годзе. Фота: Wikimedia Commons
Конкурс будзе цягнуцца да 30 верасня (у некаторых краінах — з 1 па 31 кастрычніка). Ягоная мэта — прыцягненне ўвагі да культурнай спадчыны краін-удзельніц. Пра гэта паведамляе тэлеграм-канал «Беларуская Вікіпедыя».
Упершыню конкурс пад названай «Нацыянальныя манументы» (Rijksmonuments) быў праведзены ў 2010 годзе ў Нідэрландах. Тады ўдзельнікі загрузілі больш за 12 500 фотаздымкаў. Ашаламляльны поспех прыцягнуў увагу іншых еўрапейскіх краін. У наступным 2011 годзе пры падтрымцы арганізацыі «Дні еўрапейскай спадчыны» конкурс «Вікі любіць помнікі» стаў міжнародным, у ім удзельнічала 18 краін. 5000 удзельнікаў загрузілі 168 208 здымкаў, што зрабіла конкурс найбуйнейшым у свеце, ён быў унесены ў Кнігу рэкордаў Гінеса.
Драўляная царква ў гонар абраза Божай Маці «Усіх гаротных Радасць» у Катэрцы Сямяціцкага павета. Вёска размешчана за пару кіламетраў ад Беларусі, тут дагэтуль жывуць этнічныя беларусы. Фотаздымак — адзін з фіналістаў нацыянальнага конкурсу ў Польшчы ў 2021 годзе. Фота: Wikimedia Commons
Але ўжо на наступны год рэкорд быў пабіты, калі ўдзельнікі загрузілі ў «Вікіпедыю» ў два разы больш здымкаў — 353 768! 2012 год быў адзіным, калі ў конкурсе брала ўдзел і Беларусь. Беларусы загрузілі больш за 7 400 фота, што да гэтага стварае асноўны масіў здымкаў, якімі ілюструюцца артыкулы пра айчынныя славутасці і гарады. Аўтары найлепшых фотаздымкаў былі ўзнагароджаныя.
Далей, як тлумачыцца ў допісе, Беларусь не ўдзельнічала праз нізкі ўзровень развіцця грамадзянскай супольнасці, моўную раз'яднанасць (беларусы напаўняюць адразу тры «Вікіпедыі»: дзве беларускія і рускую), адсутнасць арганізатараў і спонсараў.
Рэшткі Траецкай царквы ў вёсцы Белая Царква Чашніцкага раёна. Фотаздымак быў адным з фіналістаў нацыянальнага конкурсу ў 2012 годзе. Фота: Wikimedia Commons
Сёлета наша краіна па тых жа прычынах зноў не бярэ ўдзелу ў конкурсе, але вікіпедысты заклікаюць беларусаў удзельнічаць за іншыя краіны, у якіх яны былі ў адпачынку ці цяпер стала жывуць. Сярод суседзяў гэта Польшча, Украіна (тут конкурс пройдзе ў кастрычніку) і Расія, а таксама Германія, Вялікабрытанія, Аўстрыя, Італія, Іспанія, Партугалія, Сербія, Харватыя, Грэцыя, ЗША ды іншыя краіны свету.
Веласіпедыст праязджае праз храм Смарагдавага Буды ўздоўж сцяны Палацавага комплексу Бангкока. Фота заняло першае месца ў 2022 годзе. Фота: Wikimedia Commons
Адзначаецца, што ўзяць удзел надзвычай проста: дастаткова зарэгістравацца ў «Вікіпедыі», знайсці сярод краін-удзельніц тую, у якой вы былі і здымалі нейкія культурныя каштоўнасці, а пасля ў прыкладзеных спісах помнікаў адшукаць канкрэтны помнік і загрузіць для яго свой фотаздымак. Конкурс праходзіць у два этапы, спачатку адбіраюцца пераможцы на нацыянальным узроўні мясцовым журы, а пасля з нацыянальных пераможцаў выбіраюцца выніковыя. Але на абодвух этапах пераможцаў чакаюць узнагароды, гэта могуць быць як грашовыя прызы, так і, напрыклад, аплачаны адпачынак у нейкай краіне.
Купал капліцы Баімаў у Львове. Адзін з пераможцаў украінскага нацыянальнага этапу конкурсу ў 2022 годзе. Фота: Wikimedia Commons
Аўтары допісу развейваюць сумненні людзей, якія лічаць, што іх здымкі, зробленыя на тэлефон у вандроўках, нікому на такім конкурсе не патрэбныя. Па-першае, якасць здымкі сённяшніх смартфонаў вельмі высокая і яе цалкам дастаткова для патрэб вікі-праектаў. Па-другое, сутнасць конкурсу не столькі ў перамозе, колькі ў дапамозе з ілюстрацыямі да артыкулаў і візуальнай фіксацыі помнікаў.
Ліелстраўпскі замак у вёсцы Страўпэ Цэсіскага краю. Адзін з пераможцаў латвійскага нацыянальнага этапу конкурсу ў 2022 годзе. Фота: Wikimedia Commons
І хоць Беларусь ізноў не бярэ ўдзелу, беларускія вікіпедысты заклікаюць усё роўна загружаць свае фотаздымкі краіны. А патрэбна, здаецца, абсалютна ўсё: ад будынкаў райвыканкамаў да вёсак, ад вуліц да музейных артэфактаў, ад рэк і пагоркаў да партрэтаў беларускіх дзеячаў.
Таксама здымкі можна ахвяраваць праз адмысловы дазвол або пазначыць свае архіўныя альбомы ліцэнзіяй CC-BY-SA 3.0 і даць вікі-рэдактарам да іх доступ, калі самім няма часу і магчымасці гэтым займацца.
На сёння ў Вікісховішчы захоўваецца звыш 96 млн медыяфайлаў рознай тэматыкі. Папаўненне яго фотаздымкамі Беларусі мае важнае значэнне для пашырэння беларушчыны і прэзентацыі краіны ў свеце — любы артыкул чытаецца лепш, калі ён добра і якасна ілюстраваны. Гэтымі здымкамі і тэкстамі карыстаюцца і школьнікі, і дактары навук, і медыя, і навучальныя ўстановы.
«Наша Нiва» — крыніца якаснай інфармацыі і бастыён беларушчыны
ПАДТРЫМАЦЬ «НН»Чытайце таксама:
