Міку Джагеру ў ліпені споўнілася 80 гадоў. На сцэне ён 65 гадоў, а Rolling Stones сёлета споўніўся 61 год. Фота: Stu Forster / Getty Images
Няўжо Rolling Stones толькі што абвясцілі пра выпуск новага альбома? Прадстаўнікі гурта кажуць «без каментароў», але прыхільнікі, якія чакаюць новага альбома, гатовыя ўгледзець прыкметы непазбежнага яго з'яўлення ў чым заўгодна, уключаючы газетныя аб'явы, піша Бі-бі-сі.
Рэклама новай крамы па рамонце шкла ў невялікай лонданскай газеце Hackney Gazette неабазнанаму чалавеку падасца даволі трывіяльнай.
«Hackney Diamonds, Specialists in Glass Repair, Opening September 2023» («Hackney Diamonds, спецыялісты па рамонце шкла, адкрыццё ў верасні 2023 года»), — напісана ў абвестцы на трэцяй старонцы газеты ад 17 жніўня.
Далей у рэкламе паведамляецца, што прадпрыемства было заснавана ў 1962 годзе — у год заснавання Rolling Stones.
«Наша дружная каманда абяцае вам задавальненне. Калі вы скажаце «Дай мне прытулак» — мы адрамантуем вашы разбітыя вокны», — гаворыцца ў аб'яве. Фанаты без цяжкасцяў расшыфравалі спасылкі на некаторыя з найбольш вядомых хітоў гурта і выказалі здагадку, што гэта прамоўшн 31-га студыйнага альбома гурта, які выйдзе ў верасні.
Прыхільнікі знайшлі шмат знаёмых спасылак на гісторыю, тэксты і іканаграфію групы.
На літары «i» ў слове Diamonds намаляваны лагатып групы ў выглядзе языка і вуснаў. Diamonds таксама адсылае да турнэ Rolling Stones, прысвечанага 60-годдзю гурта і распачатаму летась у Мадрыдзе.
У тэкст рэкламы ўключаны спасылкі як мінімум на тры найбольш вядомыя хіты групы: (I Can't Get No) Satisfaction, Gimme Shelter і Shattered.
Па даных выдання NME, для надпісу Hackney Diamonds выкарыстаны той жа шрыфт, што і на альбоме гурта 1978 года Some Girls.
Рэклама накіроўвае чытачоў на вэб-сайт, дзе карыстальнікам прапануецца зарэгістравацца, а ўмовы прыватнасці падпісаны лэйблам групы Universal Music Group, якая займаецца выпускам бэк-каталога Rolling Stones.
Летась Rolling Stones адзначылі сваё 60-годдзе еўрапейскім турнэ па 10 краінах, уключаючы Вялікабрытанію.
Іх альбом з новай арыгінальнай музыкай стане першым пасля альбома 2005 года «A Bigger Bang» і першым пасля смерці барабаншчыка Чарлі Уотса ў 2021 годзе (ва ўзросце 80 гадоў).
Нязменнаму франтмену групы Міку Джагеру сёлета таксама споўнілася 80, Роні Вуду — 76, Кіту Рычардсу — 79.
Чытайце таксама:
Брытні Спірс разышлася з трэцім мужам праз год пасля вяселля
Бельгійскі ўніверсітэт запускае курс аналізу тэкстаў Тэйлар Свіфт
