Пласціна з аксіду галію дыяметрам дзве цалі (50,8 мм) у Міжнародным цэнтры навукі і інавацый Чжэцзянскага ўніверсітэта ў Ханчжоу, Кітай. Увечары 3 ліпеня 2023 года Міністэрства гандлю і Галоўнае мытнае ўпраўленне апублікавалі аб'яву аб увядзенні экспартнага кантролю тавараў, звязаных з галіем і германіем. CFOTO / Future Publishing праз Getty Images
Кітай уводзіць экспартныя абмежаванні на два карысныя выкапні, якія выкарыстоўваюцца для вытворчасці паўправаднікоў, ракетных сістэм і сонечных батарэй.
Металы галій і германій, а таксама больш за тры дзясяткі роднасных элементаў трапяць пад экспартны кантроль з 1 жніўня, як заявіла ў панядзелак Міністэрства гандлю Кітая. У заяве гаворыцца пра абарону нацыянальнай бяспекі і інтарэсаў.
Эксперты мяркуюць, што гэтае рашэнне — дэманстрацыя сілы напярэдадні эканамічных перамоў са Злучанымі Штатамі, якія ўсё часцей усталёўваюць гандлёвыя правілы для дасягнення тэхналагічных пераваг, як піша Wall Street Journal.
Чаму гэтыя металы такія важныя
І галій, і германій уваходзяць у лік 50 мінералаў, якія Геалагічная служба ЗША лічыць «крытычнымі», то-бок яны неабходныя для эканамічнай або нацыянальнай бяспекі ЗША і ланцужок іх паставак уразлівы да збояў.
Германій, бліскучы шаравата-белы метал, часта выкарыстоўваецца ў вытворчасці валаконна-аптычных сістэм і сонечных батарэй, у тым ліку тых, якія выкарыстоўваюцца для перадачы энергіі з космасу.
Галій, пры пакаёвай тэмпературы мяккі серабрысты метал, — ключавы кампанент асабліва запатрабаваных сёння паўправаднікоў, якія выкарыстоўваюцца ў зарадных прыладах для тэлефонаў і электрычным транспарце, у камерцыйных і вайсковых праграмах, якія цяпер хутка развіваюцца.
Так выглядае металічны галій. Фота Wikimedia Commons
Паводле інфармацыі брытанскага цэнтра UK Critical Minerals Intelligence Centre, на Кітай прыпадае каля 94 працэнтаў сусветнай вытворчасці галію.
Эканамічнае супрацьстаянне Кітая і ЗША
У кастрычніку Злучаныя Штаты прыпынілі экспарт у Кітай абсталявання, якое выкарыстоўваецца для вытворчасці больш тэхнічна дасканалых паўправаднікоў, і заклікалі сваіх саюзнікаў, такіх, як Паўднёвая Карэя і Нідэрланды, зрабіць тое ж самае. Адміністрацыя Байдэна таксама ўскладніла для Кітая куплю літаграфічных машын, неабходных для вытворчасці высокапрадукцыйных чыпаў.
Нядаўна кітайскія вытворцы і пастаўшчыкі чыпаў, якія сабраліся ў Шанхаі на галіновае мерапрыемства, пачулі, што адміністрацыя Байдэна разглядае новыя абмежаванні на экспарт чыпаў штучнага інтэлекту ў Кітай.
Таму ў цяперашнім рашэнні Кітая галіновыя аналітыкі бачаць цалкам прадказальны адказ.
«Калі вы не адправіце высокатэхналагічныя чыпы ў Кітай, Кітай адкажа тым, што не адправіць вам элементы, неабходныя для вырабу гэтых чыпаў», — цытуе WSJ словы Алістэра Ніла, аднаго з кіраўнікоў міжнароднай арганізацыі Critical Mineral Institute, які мае вялікі досвед працы ў металургічнай прамысловасці Кітая.
ЗША, са свайго боку, асцерагаюцца, што Кітай можа выкарыстоўваць амерыканскія мікрачыпы ў ваенных мэтах.
Спробы дамовіцца?
Кітайска-амерыканскае суперніцтва ўсё часцей звязанае з экспартнымі абмежаваннямі, скіраванымі на запаволенне развіцця высокатэхналагічных галін іншай краіны, як падсумоўваюць аналітыкі.
Абодва бакі вытлумачваюць такі кантроль «пытаннямі нацыянальнай бяспекі». Аднак гандлёвыя скаргі на такія дзеянні сталі падставай для аднаўлення перамоў на высокім узроўні. Так, у мінулым месяцы КНР наведаў дзяжсакратар ЗША Энтані Блінкен — упершыню за пяць гадоў.
У канцы гэтага тыдня Кітай мае наведаць міністарка фінансаў ЗША Джанет Елен. Напружанасць у сферы гандлю, тэхналогій і Тайваня падахвочвае абедзве краіны перагледзець камерцыйныя і інвестыцыйныя сувязі, якія дзесяцігоддзямі вызначалі іх адносіны.
Падставай для перамоў ёсць і тая акалічнасць, што, як папярэдзіў Міжнародны валютны фонд, можа адбыцца «фрагментацыя» сусветнай эканомікі на два блокі. А гэта замарудзіць глабальны рост.
Калі і без таго напружаныя адносіны пагоршаюць, афіцыйныя асобы ЗША асцерагаюцца, што Кітай можа перакрыць доступ да ключавых тавараў, такіх, як кампаненты для акумулятараў электрамабіляў.
У Пекіне афіцыйныя асобы крытыкуюць кантроль над тэхналогіямі ЗША як спробу стрымаць эканамічнае развіццё Кітая.
Байдэн назваў Сі Цзіньпіна дыктатарам праз дзень пасля візіту дзяржсакратара ў Пекін
Кітай паабяцаў ЗША не даваць зброі Расіі — CNN
Кітай хоча, каб штучны інтэлект адлюстроўваў асноўныя каштоўнасці сацыялізму
