Адзін з самых паважаных і тытулаваных трэнераў Беларусі пазбаўлены імянной прэзідэнцкай стыпендыі. Акрамя таго, з яго ў дасудовым парадку спаганяюць сродкі за адміністрацыйнае правапарушэнне. Дакумент аб гэтым патрапіў у распараджэнне рэдакцыі sport.tut.by.
У дакуменце РЦАП па фрыстайле за подпісам дырэктара паведамляецца, што Мікалай Казека пазбаўлены імянной стыпендыі прэзідэнта. Акрамя таго, з яго спаганяюць сродкі, выплачаныя «ў перыяд з 13.07.2019 па 02.06.2020» (па адміністрацыйным спагнанні).
У лісце яму прапануюць вярнуць гэтыя грошы ў добраахвотным дасудовым парадку.
У РЦАП па фрыстайле нам пацвердзілі сапраўднасць дакумента, а таксама сказалі, што 16 верасня (учора) Казека быў азнаёмлены з ім.
На дакуменце ёсць каментар за яго подпісам: «звярнуўся да міністра з лістом-зваротам за тлумачэннем аб сутнасці прэтэнзій па вяртанні атрыманых сродкаў».
Мікалай Казека ў канцы жніўня асудзіў гвалт пасля выбараў у Беларусі.
«Людзі выйшлі на вуліцы, каб сказаць сваё меркаванне з нагоды вынікаў выбараў, яны хацелі выказаць сваю незадаволенасць. Людзі выходзілі на мірныя акцыі. Але, шчыра, я не чакаў, што ў дачыненні да грамадзян рушыць услед такая жорсткая рэакцыя. Балюча. Зразумейце, праверыць, разабрацца ва ўсёй несправядлівасці [выбараў] быў час, была магчымасць, але другі бок вырашыў проста задушыць пратэсты — гэта няправільна, гэта бесчалавечна. Не ў нашай краіне так рабіць. Тым больш пратэсты людзей, як цяпер высвятляецца, мелі пад сабой рэальныя падставы. Бо мы бачым, што на выбарах былі падробкі», — сказаў тады ён.
Мікалай Казека —адзін з найлепшых трэнераў у беларускім спорце. Яго вучні-фрыстайлісты прынеслі Беларусі чатыры золата, адно срэбра і дзве бронзы на Алімпійскіх гульнях. Сам жа Казека з'яўляецца поўным кавалерам ордэна Айчыны, мае ордэн Пашаны і медаль «За працоўныя заслугі».