У расійскім Уладзівастоку супрацоўнікі расійскай ФСБ ва ўзаемадзеянні з ГУБАЗіК МУС Беларусі затрымалі Сяргея Дзербянёва — аднаго з лідараў банды Марозава, паведамляе прэс-служба міліцыі.
Мужчына працаваў ахоўнікам на адным з прадпрыемстваў. Падчас затрымання ён прад'явіў расійскі пашпарт на чужое імя.
52-гадовы гамяльчанін знаходзіцца ў СІЗА, рыхтуецца працэдура яго экстрадыцыі ў Беларусь.
Сяргей Дзербянёў больш за 14 гадоў знаходзіўся ў міжнародным вышуку за здзяйсненне забойстваў у Гомельскай вобласці ў канцы 1990-х — пачатку 2000-x.
Усяго следствам было даказана больш за 100 злачынстваў, учыненых «марозаўцамі», у тым ліку каля 20 забойстваў. Лідары групоўкі Сяргей Марозаў, Ігар Данчанка і Валерый Гарбаты былі прысуджаныя да расстрэлу.
На свабодзе застаюцца яшчэ два ўдзельнікі арганізаванай злачыннай групы.