Віртуальны аблёт валуноў, калі б яны былі адкапаныя. Камп’ютарная сімуляцыя LBI ArchPro
Група археолагаў з дапамогай радыёлакацыйнага абсталявання, лідáраў і магнітометраў знайшлі ў трох кіламетрах ад Стоўнхенджа групу валуноў, схаваных у метры пад зямлёй.
BBC піша, што гэта можа быць найвялікшым археалагічным помнікам часоў неаліту ў Брытаніі. The Guardian ацэньвае маштабы знаходкі як «археалогію на стэроідах». Daily Mail называе знаходку «Стоўнхендж-2».
Схаваныя пад зямлёй стаячыя валуны дасягаюць 4,5 метра ў вышыню, лінія можа налічваць 90 і больш такіх валуноў. Пабудове каля 4500 год — яе маглі збудаваць тыя ж людзі, што будавалі суседні Стоўнхендж.
У адрозненне ад Стоўнхенджа, дзе валуны выстаўленыя ў колы, камяні «Стоўнхенджа-2» утвараюць амаль прамую лінію. Валуны размешчаныя па паўднёва-усходнім краі таго, што пазней стала вядома як Дарынгтан-Уолс, буйнога паселішча часоў неаліту, дзе меркавана жылі будаўнікі Стоўнхенджа.
Магчымы выгляд валуноў, калі б яны былі адкапаныя. Тут і ніжэй выявы: Ludwig Boltzmann Institute/Geert Verhoeven Institute
«Новая знаходка дэманструе цалкам нечаканы этап манументальнай архітэктуры ў адным з самых вялікіх цырыманіяльных месцаў у дагістарычнай Еўропе», — кажа Вінс Гафні з Універсітэта Брэдфарда, адзін з кіраўнікоў праекту Stonehenge Hidden Landscapes.
Хаця ў Дарынгтан-Уолс раней знаходзілі меншыя па памерах рытуальныя структуры з камяня і дрэва, такой вялікай знаходкі не чакаў ніхто. Магчыма, усё, што на сёння вядома пра Стоўнхэндж, прыйдзецца перапісаць.
Дарынгтан-Уолс на паўночным захадзе ад Стоўнхенджа
Паводле папярэдніх даследаванняў, характар камянёў падобны да тых, з якіх збудаваны Стоўнхэндж. Але прызначэнне пабудовы застаецца загадкай: хутчэй за ўсё, камяні мелі рытуальнае значэнне, ды якое менавіта, невядома. Як невядома і тое, як і калі камяні апынуліся пад зямлёй. Магчыма, яны ўмацоўвалі магутны земляны вал вакол паселішча.
Абсталяванне, з дапамогай якога былі знойдзеныя валуны, не дае адказаў на многія пытанні — нават не можа сказаць, якога паходжання і складу гэтыя валуны. Далейшыя даследаванні хутчэй за ўсё будуць патрабаваць раскопак, але дата іх пачатку яшчэ не прызначаная.
Працэс пошуку падземных структур побач са Стоўнхенджам