Akcyja pratestu ŭ Tbilisi z 11 na 12 maja 2024 hoda. Skryn videa «Echa Kaŭkaza»
U noč z 11 na 12 maja ŭ stalicy Hruzii prajšła samaja masavaja akcyja pratestu suprać pryniaćcia zakonaprajekta «Ab prazrystaści zamiežnaha ŭpłyvu», jaki nazyvajuć anałaham rasijskaha zakona ab «zamiežnych ahientach», paviedamlaje Euronews.
Akcyja pratestu ŭ Tbilisi z 11 na 12 maja 2024 hoda. Skryn videa «Echa Kaŭkaza»
Manifiestanty ź niekalkich kirunkaŭ prajšli maršam pa centry horada da płoščy Jeŭropy, dzie adbyłasia asnoŭnaja častka pratesnaj akcyi. Pavodle acenak miascovych ŚMI, na joj sabralisia da 200 tysiač čałaviek. Prysutnyja zapatrabavali ad urada krainy adklikać zakonaprajekt, jaki, jak ličać jaho krytyki, dazvolić uradu dušyć hałasy niezaležnych NKA i apazicyi.
Jaho abaroncy, naadvarot, nastojvajuć, što dakumient nie ŭtrymlivaje represiŭnych mier, i pryznačany dla pavieličeńnia prazrystaści arhanizacyj u niekamiercyjnym siektary. Jany taksama śćviardžajuć, što zakon paŭtaraje normy nie z rasijskaha, a z amierykanskaha zakanadaŭstva.
Zhodna z dakumientam, ŚMI, niaŭradavyja arhanizacyi i inšyja niekamiercyjnyja arhanizacyi pavinny buduć zarehistravacca jak «tyja, što pieraśledujuć intaresy zamiežnaj dziaržavy», kali jany atrymlivajuć bolš za 20% finansavańnia z-za miažy.
Nastupnuju akcyju suprać hetaha zakona apazicyja anansavała ŭ noč z 12 na 13 maja la budynka parłamienta Hruzii.
13 maja pavinna prajści pasiadžeńnie jurydyčnaha kamiteta parłamienta, na jakim skandalnuju inicyjatyvu abmiarkujuć u trecim čytańni, piša «Echa Kaŭkaza». Pasiadžeńnie siesii i hałasavańnie ŭ trecim, finalnym, čytańni ŭ parłamiencie pavinna adbycca 14 maja.
Čytajcie taksama:
Futbalistam zbornaj Hruzii ŭručać ordeny Honaru za vychad na Jeŭra-2024
U Hruzii špitalizavali 8 pratestoŭcaŭ suprać zakona ab inšahientach
Prezidentka Hruzii paabiacała nakłaści vieta na zakon «ab zamiežnych ahientach»
