Pavodle viersii Andreja Kisialova, na sajcie pa prodažy aŭto Avito jon znajšoŭ abjavu pa prodažy śpisanych vajskovych aŭtamabilaŭ. Mužčyna tady stelefanavaŭsia z pradaŭcom, jaki pradstaviŭsia Dźmitryjem i skazaŭ, što maje majsterniu ŭ horadzie Horki na Mahiloŭščynie.
Spačatku rasiejec ź biełarusam abmierkavali košt techniki i dzień pryjezdu, a ŭ kancy červienia 2023 hoda Kisialoŭ sa svajoj žonkaj i kiroŭcam Viktaram pryjechaŭ u Horki. Pahladzieŭšy techniku, jon damoviŭsia ŭviečary paśla pracy abmierkavać kala doma Dźmitryja ŭmovy ździełki.
Jak piša rasiejec u danosie, kali mužčyny sustrelisia ŭviečary, jon raskazaŭ biełarusu pra toje, što razam z žonkaj vałancioryć i ŭdzielničaje ŭ tak zvanaj «SVA». Pavodle jahonych słoŭ, Dźmitryj na hetuju infarmacyju adreahavaŭ niadobrazyčliva i zajaviŭ, što prezident Rasii Pucin — zabojca, a Łukašenka — vorah svajho naroda, i što ich abodvuch nieabchodna rasstralać.
Taksama biełarus nibyta zajaviŭ, što ŭkraincy abaraniajuć svoj dom i svaju Radzimu ad rasiejcaŭ, prytym skazaŭ, što narod Biełarusi nie padtrymlivaje Łukašenku i ŭ vypadku ŭciahvańnia respubliki ŭ kanflikt biełarusy buduć prymać udzieł u kanflikcie na baku USU suprać rasiejcaŭ.
«Taksama jon kazaŭ, što ŭ respublicy niama svabody słova, nielha pravieści hiej-parad i nios inšuju łuchtu. Adnym z patrabavańniaŭ Dźmitryja była raśpiska, jakuju ja pavinien byŭ jamu napisać, a mienavita: aŭtamabili nie buduć adpraŭlenyja ŭ zonu SVA. Ja jamu ŭ raśpiscy admoviŭ», — paviedamlaje rasiejec Andrej Kisialoŭ u svaim danosie ŭ KDB.
Takim čynam, ździełka nie adbyłasia, i rasiejcy pajechali dadomu.
Ale hetaja situacyja tak kranuła Kisialova, što jon vyrašyŭ napisać danos na biełarusa ŭ KDB, kab jon učyniŭ pravierku dziejnaści Źmitra i jaho vykazvańniaŭ suprać ułady Biełarusi i Rasii.
Čytajcie taksama:
Dvoje siabroŭ «Narodnaj hramady» pisali danosy ŭ KDB. Chto jany i jak tłumačać situacyju?