Źniknieńnie Jurasia Korbana
Niebiaśpiečnyja suviazi viciebskaha pacana
Miesiac tamu źnik kiraŭnik viciebskaha Centru moładzievych inicyjatyvaŭ “Kontur”, namieśnik staršyni miascovaj haradzkoj arhanizacyi BNF i hałoŭny kandydat na pasadu kiraŭnika abłasnoje supołki BNF 23-hadovy Juraś Korban.
Korban źnik nie biaśśledna: pieršymi dniami jon niekalki razoŭ azyvaŭsia telefanavańniami da maci. Pryčym zvanki hetyja byli zroblenyja ź jahonaha ŭłasnaha mabilnaha telefonu. Jak paviedamili ŭ firmie Velcom, Korban zvaniŭ maci to ź Viciebsku, to ź Bieraścia, to navat z Varšavy, apošnija telefanavańni byli sa staličnych rajonaŭ Sierabranki i Čyžoŭki. Spačatku Juraś kazaŭ, što nieŭzabavie źjavicca dadomu, paśla — što sustreŭ niejkaha čałavieka i zmušany na peŭny čas źjechać razam ź im, potym — što jany z maci mohuć bolš nia ŭbačacca.
Padčas apošniaj telefonnaj razmovy 23 studzienia jon paprasiŭ maci znajści bujnuju sumu hrošaj — kali što, navat pradać kvateru — i pryvieźci ich 28 studzienia ŭ Miensk. Pra jakuju kolkaść hrošaj išła havorka, Nina Korban nia kaža. Siabry Jurasia śćviardžajuć, što 20 tysiač dalaraŭ.
Adnak sustrečy ani z samim Jurasiom, ani z kim-niebudź inšym nie adbyłosia, bo maci nie atrymała nijakich harantyjaŭ, što jejnaha syna adpuściać. Bolš telefanavańniaŭ z vymohami vykupu nie było, choć maci Korbana ŭ čakańni źviestak pra los syna ŭziała navat adpačynak i ceły tydzień prasiedzieła kala telefonu.
Maci peŭnaja, što tut sprava tolki palityčnaja, što syn jejny paciarpieŭ za svaju hramadzka-palityčnuju dziejnaść: “Nas chočuć zapeŭnić, što źniknieńnie Jurasia — heta sprava jahonych ža ruk ci vykradańnie z metaj vykupu. Ale abiedźvie hetyja versii niasłušnyja”.
Tym nia mienš, versiju pra datyčnaść kryminału da źniknieńnia kiraŭnika “Konturu” praciahvajuć raspracoŭvać pravaachoŭnyja orhany. Tyja 20 tys. dalaraŭ sapraŭdy mahli być sumaj zapatrabavanaha za Jurasia Korbana vykupu. Chto nia ličyć u Biełarusi, što ŭ tak zvanym “trecim sektary” kruciacca niemałyja hrantavyja hrošy! Hetyja čutki i stereatypy rana ci pozna pavinny byli navieści rekiet na supracoŭnikaŭ niedziaržaŭnych arhanizacyj.
Juraś Korban dobra znajomy supracoŭnikam “NN”, bo mienavita jon zładziŭ sustreču našaniŭcaŭ ź viciebskimi čytačami ŭ 2000 h. Sustreča taja prajšła ź vialikim pośpiecham u tamtejšym prestyžnym klubie “Sava”. Korban — talenavity arhanizatar, duša viciebskaha apazycyjnaha asiarodku.
Pierad toj sustrečaj Korban u hutarcy chvaliŭsia, što zaznavaŭ “najezdy” z boku rekietu, ale ŭdała adbivaŭsia.
U Viciebsku chadzili čutki, što, kab adčapicca ad adnych, jon navat źviartaŭsia pa dapamohu inšych padazronych hrupovak. Niekatory čas letaś Korban navat mieŭ asabistych achoŭnikaŭ. Siabroŭka Korbana Volha Staraścina ŭ hutarcy z karespandentam “NN” paćvierdziła hety fakt, ale zaznačyła, što heta była nie prafesijnaja achova, a niekalki siabroŭ viciebskaha Maładoha Frontu, u jaki ŭvachodziŭ i sam Korban.
Kolki hadoŭ tamu “Kontur” usio ž staŭsia achviaraj złačyncaŭ, što skrali kamputary j inšuju arhtechniku. U vyniku hetaha lider “Konturu” mocna pasvaryŭsia ź Viktaram Vilmanam, kiraŭnikom Viciebskaha sajuzu niemcaŭ, u pamiaškańniach jakoha mieściŭsia ofis supołki. Adnak znajomcy Korbana kažuć, što apošnim časam nijakich spravaŭ ź Vilmanam toj nia mieŭ. A vymahać vykup abo prosta pomścić Korbanu moh chto zaŭhodna.
Źviazana heta moža być nia tolki z hrantavańniem “Konturu”: Juraś Korban paralelna z aktyŭnaj hramadzkaj dziejnaściu, mieŭ ułasny biznes.
Nielha adkinuć i versiju siabroŭ Korbana, što ŭ roli vykradalnikaŭ vystupili biełaruskija specsłužby, jakija hetkim čynam “dapamahajuć” Kamitetu finansavych raśśledavańniaŭ pa Viciebsku dakazać fakty niepravamocnaha vykarystańnia srodkaŭ z boku viciebskich hramadzkich arhanizacyjaŭ, u tym liku “Konturu”. Bo nakont hetaha ŭzbudžanaja kryminalnaja sprava, u jakoj fihurujuć niekalki tysiač dalaraŭ.
U Kamitecie, adnak, kažuć, što sami łamajuć hałovy, kudy padzieŭsia Korban, jaki źnik u subotu 19 studzienia, a ŭ paniadziełak 21-ha musiŭ źjavicca na dopyt da fininspektaraŭ. Pavodle ichnaje versii, Korban jakraz ad ich sam i chavajecca, pryŭłaščyŭšy peŭnuju sumu. A zvankami da maci z namiokami ab prymusovym źniknieńni “abstaŭlaje” svaju emihracyju za miažu.
Kali heta čarhovaje palityčnaje źniknieńnie, značyć specsłužby ŭzialisia asvojvać novuju schiemu raspravy ź niazhodnymi i sacyjalna aktyŭnymi, pradstaŭlajučy ich zvyčajnymi achviarami kryminalnikaŭ. Pravaabaroncy ź “Viasny” padkreślivajuć nadzvyčaj efektyŭnuju arhanizacyju Jurasiom Korbanam nazirańnia za vybarami 9 vieraśnia.
Milicyja, sa słovaŭ maci Jurasia Korbana, pakul ničoha nia robić. Praŭda, admysłovuju zajavu ŭ pravaachoŭnyja orhany jana padała zusim niadaŭna, i kryminalnaja sprava pa fakcie źniknieńnia lidera viciebskaha moładzievaha ruchu była adkrytaja tolki 12 lutaha. Dezinfarmacyjaj z boku specsłužbaŭ mohuć być i źviestki, jakija pryjšli da tych, chto šukaje Jurasia Korbana pryvatna, litaralna adrazu paśla taho, jak u Miensku byli raspaŭsiudžanyja ŭlotki ź infarmacyjaj pra źniknieńnie z apisańniem kiraŭnika “Konturu”: nibyta hrupoŭka na čale z kryminalnym aŭtarytetam Udavam ciahaje pa Miensku źbitaha chłopca 25 hadoŭ, a atabarylisia złačyncy ŭ domie ŭ rajonie staličnaha zaaparku. Tam, dzie i byli zapelenhavanyja apošnija zvanki Jurasia Korbana da maci ŭ Viciebsk.
Spravaj čyich by ruk ni było źniknieńnie Korbana, dla arhanizacyjaŭ “treciaha sektaru” ŭ Biełarusi prabomkaŭ tryvožny zvanočak. Niaŭradavyja arhanizacyi z kožnym hodam nabyvajuć usio bolej upłyvu i aŭtarytetu. Ale aŭtarytet niaŭradavych arhanizacyj moža vielmi chutka zaplamicca, kali vyjavicca, što kiraŭniki “treciaha sektaru” majuć suviazi z kryminalnym śvietam. Chočacca vieryć, što Juraś Korban u hetym sensie čysty. I što ź im usio ŭ paradku.
Ihnat Čakacki
