«Pryjšła hałasavać z-za pahroz kiraŭnictva ŭniviersiteta vyhnać jaje z vučoby» 1

U čaćviorty dzień daterminovaha hałasavańnia, 21 vieraśnia, naziralniki praciahvali fiksavać fakty prymusu da hałasavańnia. Asabliva pakazalnyja fakty vyjavili naziralniki prajekta «Nazirańnie za vybarami: teoryja i praktyka». Jak paviedamiła kaardynatar prajekta nazirańnia Anastasija Matčanka,

na ŭčastku № 595 107-j Uschodniaj vybarčaj akruhi ŭ Minsku adna sa studentak Biełaruskaj dziaržaŭnaj akademii mastactvaŭ zajaviła kamisii, što pryjšła hałasavać z-za pahroz kiraŭnictva ŭniviersiteta vyhnać jaje z vučoby, kali jana nie prahałasuje daterminova.

Na ŭčastku № 4 19-j vybarčaj akruhi ŭ Viciebsku naziralniki prajekta taksama fiksavali prymušeńnie da hałasavańnia z boku kuratara hrupy studentaŭ.

«Učastak № 595 107-j Uschodniaj vybarčaj akruhi ŭ Minsku naohuł unikalny — tam naziralnik Viktar Sieniukievič ad HA «Biełaja Ruś» źjaŭlajecca vykładčykam politechničnaha kaledža, u budynku jakoha znachodzicca ŭčastak.

20 vieraśnia jon pachvaliŭsia kamisii, što zahadaŭ svaim studentam prahałasavać daterminova, a 21 vieraśnia — što prasiŭ ich «prahałasavać abaviazkova», —

paviedamiła Matčanka.

Taksama jana adznačyła, što praciahvajecca tendencyja da zavyšeńnia jaŭki vybarščykaŭ na ŭčastkach pa ŭsioj Biełarusi. Učastkovaja kamisija № 449 Kalvaryjskaj vybarčaj akruhi № 104 za čatyry dni daterminovaha hałasavańnia zavysiła jaŭku amal utraja. Pavodle źviestak naziralnikaŭ, za ŭvieś čas prahałasavaŭ 101 čałaviek, adnak pa pratakołach kamisii — 237. Na ŭčastku № 6 vybarčaj akruhi № 13 u Łunincy (Bresckaja vobłaść) naziralniki zafiksavali vydaču 34 biuleteniaŭ, a pa pratakole kamisii było vydadziena 57 biuleteniaŭ.

Fakty prymusu da hałasavańnia zafiksavali taksama naziralniki kampanii «Pravaabaroncy za svabodnyja vybary». Pavodle ich źviestak, na 22% učastkaŭ, za jakimi jany nazirajuć, byŭ prymus da hałasavańnia. Adznačajecca i zavyšeńnie jaŭki vybarščykaŭ. «

Pavodle źviestak učastkovych kamisij na ŭčastkach, dzie viadziecca nazirańnie, prahałasavała 18.249 čałaviek. Pavodle źviestak naziralnikaŭ — 16.059 čałaviek», —

adznačyŭ kaardynatar kampanii Valancin Stefanovič.

Tuju ž tendencyju adznačaje i kampanija partyjnaha nazirańnia «Za spraviadlivyja vybary». «Naprykład, u Minskaj-Aŭtazavodskaj vybarčaj akruzie № 92 na ŭčastku № 60 hałasujuć kursanty Minskaha dziaržaŭnaha vyšejšaha avijacyjnaha kaledža — za čatyry dni prahałasavała kala 35%. Nam raskazvajuć, što studentaŭ prymušajuć hałasavać daterminova kuratary hrup i administracyja kaledža», — skazaŭ kaardynatar kampanii nazirańnia Viktar Karniajenka.

Akramia taho, adznačyŭ jon, ułada pačała manipulacyi sa śpisami vybarščykaŭ. «Na vybarčych akruhach papiarednie, da pačatku daterminovaha hałasavańnia, nazyvałasia ahulnaja kolkaść vybarščykaŭ. U pratakołach kamisij, jakija vyviešvajucca paśla kožnaha dnia daterminovaha hałasavańnia, taksama jość hrafa „kolkaść vybarščykaŭ“. My paličyli i ŭbačyli, što

kamisii zanižajuć kolkaść vybarščykaŭ, zarehistravanych dla hałasavańnia.

U siarednim pa krainie kolkaść vybarščykaŭ pamienšyłasia na 65 tysiač čałaviek — na cełuju vybarčuju akruhu», — skazaŭ Karniajenka.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH