Namieśnik Siarhieja Hajdukieviča za hod atrymaŭ dachod bolš za $500 tysiač 7

Siarod kandydataŭ u deputaty parłamienta možna sustreć pradstaŭnikoŭ roznych prafiesij. Chto zarablaje bolš za ŭsich? «Naša Niva» prahartała padatkovyja dekłaracyi staličnych kandydataŭ.

Varta ŭdakładnić, što ŭ pradprymalnikaŭ hetyja ličby mohuć nie adpaviadać zarobku — na vyručanyja hrošy jon znoŭ kuplaje tavar i znoŭ jaho pradaje.

Kandydat-miljarder Uładzimir Šaban

1. Uładzimir Šaban — 1,48 miljarda + valuta

27-hadovy namieśnik Siarhieja Hajdukieviča ŭ ŁDP i pa sumiaščalnictvu indyvidualny pradprymalnik staŭ haradskim rekardsmienam. Jahony aficyjny dachod za 2011 hod skłaŭ bolš za paŭmiljona dalaraŭ u ekvivalencie. Ličycie sami: 1,5 miljarda rubloŭ, $220 tysiač, 6,5 tysiač jeŭra i 35 tysiač rasijskich rubloŭ. Va ŭłasnaści ŭ miljaniera pamiaškańnie hramadskaha charčavańnia, pabudova dla śpiecyjalizavanaha roźničnaha handlu, 2 ziamielnyja ŭčastki ŭ Minsku, 2 ziamielnyja ŭčastki i žyły dom z pabudovami ŭ Viciebskaj vobłaści, lehkavy aŭtamabil.

2. Uładzimir Majbarada — 1,27 miljarda

Jašče adzin IP-šnik, 30-hadovy Uładzimir Majbarada idzie pa toj samaj Šabanoŭskaj akruzie. U adroźnieńnie ad Šabana, jon biespartyjny.

Majbarada letaś atrymaŭ dachod 1,27 miljardaŭ rubloŭ. Aproč taho, maje daču na Červieńščynie i dźvie mašyny.

Pradprymalniki zaśviacili svaje miljardy, kinuŭšy vyklik staršyni rajonnaj arhanizacyi «Biełaja Ruś». Chtości bačyć ich pierśpiektyvy pieramahčy na vybarach?

3. Ihar Babok — 281 miljon

Trecim idzie ideołah z «Miłavicy», jaki na Staravilenskaj akruzie budzie davać boj dziejsnamu deputatu Mikałaju Samasiejku i Anatolu Labiedźku. Da svajho 281 miljona jon dałučyŭ dźvie kvatery, haraž, lehkavik, a taksama akcyi — 16 akcyj «Biełarusbanka» i 1 akcyju rodnaj «Miłavicy».

4. Hanna Kanapackaja — 241 miljon

Uśled za imi idzie jašče adzin pryvatnik. Siabra AHP Hanna Kanapackaja sa svaimi 241 miljonami stała samaj bahataj kandydatkaj ad demakratyčnaj supolnicaj. Hanna źjaŭlajecca dyrektarkaj TAA «Hrynrej» i maje 24% u statutnym fondzie pradpryjemstva. Astatni bahaž standartny — kvatera, haraž, mašyna.

5. Dźmitryj Šaŭcoŭ — 181 miljon

Pieršy ź biudžetnikaŭ u śpisie, 39-hadovy Dźmitryj Šaŭcoŭ pracuje hałoŭnym uračom 34-j palikliniki. Chutčej za ŭsio, jon stanie samym bahatym deputatam ad stalicy, bo na svajoj Kołasaŭskaj akruzie vyhladaje ŭładnym kandydatam. Z majomaści — kvateru i aŭto.

6. Marat Žylinski — 152 miljony

Dalej idzie čarha humanitaryjaŭ. 36-hadovy namieśnik dyrektara Instytuta historyi, kandydat histaryčnych navuk Marat Žylinski zarabiŭ za hod 152 miljony rubloŭ. Jon źjaŭlajecca akcyjanieram domabudaŭničaha kambinata (150 akcyj) i «Bielinviestbanka» (880 akcyj). A voś svajoj kvatery pakul niama.

7. Hienadź Palčyk — 134 miljony

Byłoha dyrektara Liceja BDU i ciapierašniaha kiraŭnika Nacyjanalnaha instytuta adukacyi vyłučyła ŭ deputaty rajonnaja paliklinika, adnak u jaho inicyjatyŭnaj hrupie byli spres piedahohi. 50-hadovy Palčyk maje lehkavik, a taksama kvateru i daču na Puchaviččynie ŭ sumiesnaj ułasnaści.

8. Vital Buśko — 108 miljonaŭ

Samy bahaty ź ciapierašnich deputataŭ, jakija chočuć praciahnuć svaje paŭnamoctvy pa minskich akruhach, — 56-hadovy Vital Buśko taksama vyłučajecca ad rajonnaj palikliniki. Jahonaje deputactva pryniesła jamu amal 108 miljonaŭ rubloŭ. Buśko maje kvateru, dom z učastkam na Miadzielščynie, błok u haražy i lehkavik z pryčepam.

9. Valancina Žuraŭskaja — 101 miljon

Skančvajuć dziasiatku dvoje partyjnych kandydataŭ. Byłaja dyrektarka škoły, a ciapierašniaja deputatka Valancina Žuraŭskaja znachodzicca ŭ šerahach kamunistaŭ. Adnak u jaje va ŭłasnaści zusim kapitalistyčny nabor — kvatera, žyły dom, učastak u Baraŭlanach, a taksama ŭčastak z dačaj na Uździenščynie.

10. Hleb Vołkaŭ — 98 miljonaŭ

Kankurent Žuraŭskaj pa Matusievickaj akruzie — 39-hadovy starejšy navukovy supracoŭnik Akademii kiravańnia pra prezidencie Hleb Voŭkaŭ zusim troški nie daciahnuŭ da stamiljonnaj miažy. Jon vyłučany Libieralna-demakratyčnaj partyjaj. Siarod majomaści — kvatera, a taksama ziamla i dača ŭ Minskim rajonie.

Jahor Marcinovič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH