U Siarhieja Kavalenki pačali aciakać nohi 2

Ź viciebskim aktyvistam Kansiervatyŭna-chryścijanskaj partyi — BNF Siarhiejem Kavalenkam u mahiloŭskaj kałonii № 19 sustreŭsia jaho advakat.

Jak paviedamiła žonka apazicyjaniera Alena Kavalenka, pakul Siarhiej znachodzicca na karancinie, prykładna praz tydzień jaho pavinny pieravieści ŭ atrad. Pavodle jaje słoŭ, u muža praciahvajucca prablemy sa zdaroŭjem. U pryvatnaści advakat paviedamiŭ, što ŭ jaho aciakajuć nohi. Miedyki ŭziali ŭ źniavolenaha analizy.

Alena Kavalenka paviedamiła, što jana kansultavałasia ŭ śpiecyjalistaŭ, jakija miarkujuć, što acioki mohuć być vyklikany zachvorvańniami sardečna-sasudzistaj sistemy.

Jana paviedamiła taksama, što pakul nie pieradavała mužu lekaŭ, bo ich śpis nie ŭzhodnieny z kiraŭnikom miedčaści kałonii.

Pakul abmiežavany i pieradačy mužu, bo jon nie pieraviedzieny ŭ atrad.

Pavodle słoŭ žonki apazicyjaniera, u hod Kavalenku dazvoleny try karotkaterminovyja spatkańni ź blizkimi i čatyry pieradačy pa 30 kh kožnaja.

Adnak heta pry ŭmovie, što ŭ dačynieńni da jaho nie budzie dyscyplinarnych spahnańniaŭ u kałonii.

***

Siarhiej Kavalenka byŭ zatrymany 19 śniežnia 2011 hoda pavodle abvinavačańnia va ŭchileńni ad adbyvańnia pakarańnia ŭ vyhladzie abmiežavańnia voli (art. 415 KK). Havorka idzie pra pakarańnie, jakoje było vyniesiena apazicyjanieru ŭ mai 2010 hoda za vyviešvańnie bieł-čyrvona-biełaha ściaha na hałoŭnaj navahodniaj jołcy Viciebska. U lutym hetaha hoda Kavalenku asudzili na dva hady i adzin miesiac pazbaŭleńnia voli ŭ kałonii ahulnaha režymu. Adrazu paśla zatrymańnia jon abviaściŭ haładoŭku pratestu, jakaja doŭžyłasia ź nievialikimi pierapynkami prykładna dva miesiacy. U pačatku krasavika apazicyjaniera pačali prymusova karmić.

10 krasavika Viciebski abłasny sud pry razhladzie kasacyjnaj skarhi Kavalenki pryniaŭ rašeńnie nakiravać jaho na kompleksnuju psichijatryčnuju ekśpiertyzu ŭ Respublikanski navukova-praktyčny centr psichičnaha zdaroŭja ŭ Navinkach (pad Minskam).

13 krasavika, užo ŭ Navinkach, apazicyjanier haładoŭku spyniŭ. Ekśpiertyza doŭžyłasia amal miesiac i pryznała Siarhieja Kavalenku psichična zdarovym, paśla čaho jaho adpravili nazad u viciebski śledčy izalatar № 2. 8 maja ŭ Viciebsku asudžany adnaviŭ haładoŭku pratestu. 18 maja Viciebski abłasny sud admoviŭsia zadavolić kasacyjnuju skarhu Siarhieja Kavalenki na prysud. Pavodle nieaficyjnaj infarmacyi, u mahiloŭskuju kałoniju apazicyjanier byŭ etapavany 19 maja.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH