Novaja moładzievaja struktura budzie nazyvacca Moładzievym rucham imia Kastusia Kalinoŭskaha. Zaplanavanaja i pieršaja akcyja hetaha ruchu – mitynh u padtrymku Alaksandra Kazulina i inšych palitviaźniaŭ. Siońnia spadar Skrabiec źbirajecca źviarnucca ŭ Mienski harvykankam z zajavaj na praviadzieńnie mitynhu.
Inicyjataram stvareńnia novaha moładzievaha ruchu vystupiŭ Siarhiej Skrabiec, a ŭznačalvaje Siarhiej Hałahaniuk. Metu jaho arhanizacyi spadar Hałahaniuk tłumačyć hetak:
Hałahaniuk: «My chočam stvaryć alternatyvu BRSM. Kaniečnie, jaho možna nazvać palityčnym moładzievym rucham i jon, naturalna, budzie demakratyčnym».
Novy moładzievy ruchu nosić imia Kastusia Kalinoŭskaha. Adpaviednaj hetaj postaci maje być i dziejnaść ruchu, u tym liku za miežami Biełarusi, kaža suzasnavalnik ruchu Alaksandar Skrabiec:
Skrabiec: «My chočam, kab ludzi vystupali ź pikietami kala ambasadaŭ u Maskvie, Kijevie, Prazie, Varšavie i hetak dalej. Kab u Biełarusi spyniłasia manarchičnaja tyranija».
Pavodle stvaralnikaŭ ruchu imia Kastusia Kalinoŭskaha, kolkaść siabraŭ arhanizacyi ŭ roznych haradach Biełarusi zaraz abahulniajecca. Bolšaść hetaj moładzi ŭžo była dałučanaja da partyjaŭ i ruchaŭ i ŭdzielničała ŭ palityčnych akcyjach. Čamu źjaviłasia patreba ŭ novaj struktury i čym jana budzie roźnicca ad dziejnych tłumačyć Siarhiej Hałahaniuk.
Hałahaniuk: «Siońnia ŭsie arhanizacyi trymajucca niejkich svaich idejaŭ. My by chacieli praź pieramovy złučyć u našym ruchu ŭsie moładzievyja abjadnańni. Bo lebiedzia, raka i ščupaka ŭžo nadakučyła bačyć. A budučynia za moładździu».
Pavodle spadara Hałahaniuka, paśla pieršaj akcyi ŭ padtrymku palitźniavolenych, maje adbycca źjezd i rehistracyja novych kalinoŭcaŭ. Nakolki zapatrabavanym siońnia jość novy moładzievy ruch havoryć palitolah Uładzimier Mackievič.
Mackievič: «Siońnia ŭ Biełarusi my majem taki paradoks, što arhanizacyi nie vykonvajuć tych funkcyjaŭ, dziela jakich stvaralisia. Zdavałasia b, heta patrabuje stvareńnia novych arhanizacyjaŭ. Ale ž, kali niama idei ‑‑ jak i čym jany buduć adroźnivacca ad starych, to my i nadalej budzie pładzić tyja ž samyja, ni na što nia zdolnyja arhanizacyi, jakija krytykujem i siońnia. Inšaja reč, što sprabavać treba i, kali jość dobraja debiutnaja ideja, to možna imknucca stvaryć niešta takoje, što budzie kardynalnym čynam roźnicca ad taho, što jość siońnia».
Halina Abakunčyk, «Radyjo Svaboda»
