Kurs čornaha rynku najaŭnych źniziŭsia da 5000—5800. Na pazabiržavym bieznajaŭnym rynku kurs apuściŭsia da 6500.
Tolki ŭ roźničnych prodažach napałochanyja krušeńniem rubla handlary vystaŭlajuć jaŭna zavyšany kurs 8000—10000. Takim čynam jany schilajuć klijentaŭ da bolš nadziejnaha raźliku ŭ dalarach.
Kurs dalara pry bieznajaŭnych pazabiržavych apieracyjach uranku apuściŭsia da 7100—7200, a paśla abiedu navat da 6500 z raniejšaha maksimumu 8000—8800, jaki fiksavaŭsia ŭ sieradu-čaćvier.
U toj ža čas kurs dalara na čornym rynku najaŭnaj valuty ŭ Minsku źniziŭsia ŭ paniadziełak da 5000—5500 (kupla) i 5300—5800 (prodaž), što nižej za ŭzrovień aŭtorka—piatnicy minułaha tydnia.
U Vilni kurs rubla zaznaŭ anałahičnyja tendencyi. Uranku paniadziełka dalar možna było pradać za 4660 rubloŭ (uviečary piatnicy za 4870, uranku piatnicy až za 5300), kupić za 5420 rubloŭ (uviečary piatnicy było 6460 rubloŭ, uranku piatnicy — 6850).
Ciažka skazać, ci tendencyja na vyroŭnivańnie rubla zachavajecca paśla 23 maja. Da hetaha dnia pradpryjemstvy spłačvajuć padatki, što vymusiła mnohich eksparcioraŭ urešcie pradać valutu, jakuju jany doŭhi čas prytrymlivali.
Kurs u abmieńnikach u paniadziełak zastavaŭsia na ŭzroŭni 4500 rubloŭ. Nahadajem, što aficyjny kurs dalara da paniadziełkavaha rašeńnia Nacbanka pra devalvacyju składaŭ 3 145 rubloŭ. Jon byŭ zanižany ŭ paraŭnańni z realnym, jaki vykarystoŭvajecca nasielnictvam i pradpryjemstvami, na 60–130%.
Premjer-ministr Biełarusi Michaił Miaśnikovič pryznaŭ, što kredyt ad JeŭrAzES składzie ŭsiaho miljard dalaraŭ i jaho budzie niedastatkova, kab stabilizavać kurs. Jon zajaviŭ, što patrebnyja dadatkovyja miery finansavaha i ekanamičnaha charaktaru. Jon paabiacaŭ pryniać ich 23—24 maja.Zrešty, i ŭmovaj vydačy kredytu budzie drakonaŭski płan ekanomii. Jon praduhledžvaje skaračeńnie biudžetnych vydatkaŭ i pryvatyzacyju hihantaŭ biełaruskaj pramysłovaści ci infrastruktury — apošnija na vybar Minska.
Rašeńnie ab dalejšych dziejańniaŭ budzie prymać, treba mierkavać, asabista Alaksandr Łukašenka. Dahetul jon marudziŭ.
Rezkaje padzieńnie rubla na čornym i bieznajaŭnym rynkach adbyłosia na minułym tydni, kali stała jasna, što kryzis budzie nasić praciahły charaktar.
Kursy realnaha rynku mianiajecca niekalki razoŭ na dzień. Takoje praciahniecca da taje pary, pakul Nacbank nie vierniecca da valutnych interviencyj.
