U Centrvybarkam Biełarusi pastupiła skarha ad kandydata ŭ prezidenty Ryhora Kastusiova z patrabavańniem pryznać vyniki prezidenckich vybaraŭ niesapraŭdnymi. Skarhu ŭ CVK pieradaŭ uviečary 22 śniežnia sam kandydat u prezidenty.
Jak paviedamiŭ sakratar CVK Mikałaj Łazavik, heta adzinaja skarha, u jakoj chto-niebudź z kandydataŭ u prezidenty prosić pryznać ciapierašnija vybary prezidenta niesapraŭdnymi.
Zhodna z Vybarčym kodeksam, kandydaty ŭ prezidenty mohuć abskardzić vyniki vybaraŭ u CVK na praciahu troch dzion paśla ich zakančeńnia. Adpaviednuju zajavu kandydat pavinien prynieści ŭ CVK asabista.
Kandydaty Uładzimir Niaklajeŭ, Andrej Sańnikaŭ, Vital Rymašeŭski, Mikałaj Statkievič i Alaksiej Michalevič, zatrymanyja padčas akcyi 19 śniežnia, zaraz znachodziacca ŭ śledčym izalatary KDB. U dačynieńni da arhanizataraŭ niesankcyjanavanaj akcyi raspačata sprava pa artykule 293 Kryminalnaha kodeksa (masavyja biesparadki). Im pahražaje da 15 hadoŭ pazbaŭleńnia voli.
Akramia Centrvybarkama kandydat u prezidenty moža asprečyć aficyjnyja vyniki hałasavańnia ŭ Viarchoŭnym sudzie - heta nieabchodna zrabić na praciahu 10 dzion paśla vybaraŭ.
Nahadajem, pa dadzienych CVK, za Alaksandra Łukašenku prahałasavała 79,67% vybarščykaŭ. Andrej Sańnikaŭ atrymaŭ 2,56% hałasoŭ, Jarasłaŭ Ramančuk - 1,97%, Ryhor Kastusioŭ - 1,97%, Uładzimir Niaklajeŭ - 1,77%, Alaksiej Michalevič - 1,2%, Vital Rymašeŭski - 1,1%, Viktar Ciareščanka - 1,08%, Mikałaj Statkievič - 1,04%, Dźmitryj Us - 0,48%.
