Stali viadomyja vyniki apošniaha pierapisu. Dola biełarusaŭ vyrasła da 84%, ale tolki 23% žycharoŭ krainy razmaŭlaje ŭ chacie pa-biełarusku.
Na pres-kanfierencyi 8 vieraśnia byli pradstaŭleny asnoŭnyja demahrafičnyja i sacyjalnyja charaktarystyki nasielnictva Respubliki Biełaruś pa vynikam pierapisu nasielnictva 2009 hodu.
«Pierapis — bujnamaštabny ŭnikalny statystyčny resurs, daje važnyja dadzienyja dla daśledavańniaŭ»,— ličyć Alena Kucharevič, namieśnik ctaršyni Nacyjanalnaha statystyčnaha kamiteta.
Pa stanie na 14 kastryčnika 2009 hoda ŭ Biełarusi žyli pradstaŭniki 140 nacyjanalnaściaŭ i narodnaściaŭ.
Dola biełarusaŭ ŭ paraŭnańni ź minułym pierapisam 1999 hoda pavialičyłasia i składaje 84%. 10 hadoŭ tamu byŭ 81%, a dvaccać tamu, na chvali savietyzacyi — tolki 77.
Da nacyi litvinaŭ siabie adnieśli 66 žycharoŭ Biełarusi, try ź jakich žyvuć u sielskaj miascovaści.
Heta, darečy, bolš za kolkaść japoncaŭ, jakich u našaj krainie pražyvaje 23 čałavieki. Adzin čałaviek nazvaŭ siabie sibirskim turkam.
Z nacyjanalnych mienšaściaŭ pa krainie čaćviorku pieršych zajmajuć rasijcy (8,3%), palaki (3,1%), ukraincy (1,7%) dy jaŭrei (0,1%). Ale taki raskład zaležyć ad vobłaści. U Minskaj i Bresckaj abłaściach, naprykład, adsotak armianaŭ bolšy za adnosnuju kolkaść jaŭrejaŭ, u Haradzienskaj vobłaści šmat ludziej nazyvali siabie palakami. U paraŭnańni z 1999 hodam u 20 razoŭ pavialičyłasia kolkaść kitajcaŭ, ale ichni ahulny ŭniosak u statystyčnuju karcinu zastajecca niaznačnym.
Zaŭvažnaja tendencyja — imklivaja asimilacyja rasiejcaŭ i palakaŭ. Rasiejcaŭ 20 hadoŭ tamu było 13%, a ciapier zastałosia amal udvaja mieniej.
Padčas pierapisu tolki 53% respandentaŭ nazvali biełaruskuju rodnaj movaj i tolki 23% — chatniaj. U 1999 hodzie biełaruskuju movu ličyli rodnaj 73,6% žycharoŭ krainy, a ŭ siemjach joj štodzionna karystałasia 37%.Siarod biełarusaŭ pa nacyjanalnaści 60% nazvali rodnaj movaju biełaruskuju, doma joju karystajucca 30%. Pamianšeńnie hetaha adsotku Alena Kucharevič źviazvaje z samavyznačeńniem respandentaŭ.
U jakaści inšaj movy, jakoj vałodajuć, biełaruskuju nazvali 13.5% apytanych, na pałovu pracenta bolš zajmieła ruskaja mova. 450 tysiač nasielnikaŭ Biełarusi svabodna vałodajuć anhielskaj movaju, što ŭ 3,2 razu bolš u paraŭnańni ź minułym pierapisam.
U ciapierašni momant u Biełarusi pražyvaje 9 młn 504 tysiačy čałaviek.Ščylnaść biełaruskaha nasielnictva składaje 46 čałaviek na 1 kv. km. Dla paraŭnańnia: ščylnaść žycharoŭ va Ukrajinie — 76, Litvie — 52, Łatvii — 30, Polščy —122.
Z momantu apošniaha pierapisu ŭ 1999-m hodzie, kolkaść žycharoŭ u Biełarusi źmienšyłasia na 541 tysiaču (5,4%). Źmianšeńnie nasielnictva nazirajecca va ŭsich abłaściach, najbolš istotnaje ŭ Viciebskaj vobłaści. Razam z tym, kolkaść žycharoŭ u Minsku pavialičyłasia na 157 tysiač i składaje 1,837 młn.
Biełaruś zastajecca adnoj z samych urbanizavanych krainaŭ Jeŭropy, 7 miljonaŭ biełarusaŭ žyvuć u haradach, 26% našaha nasielnictva składajuć sialčanie.
Na 560 tysiač źmienšyłasia kolkaść dziaciej da 15 hadoŭ, heta źviazvajuć z padzieńniem naradžalnaści ŭ 90-ych hadach.
Nacyjanalny statystyčny kamitet adznačaje pavialičeńnie chutkaści ŭrbanizacyi ŭ paraŭnańni ź minułymi pierapisami.
Pamianšeńnie nasielnictva krainy źviazvajuć u pieršuju čarhu z naturalnym pamianšeńniem dy mihracyjnym patokam. Na siońniašni momant naradžalnaść choć i nie pieravyšaje śmiarotnaść, ale pavialičvajecca, u toj čas jak śmiarotnaść pavoli pamianšajecca.
Za apošnija 10 hadoŭ kolkaść pracazdolnych žycharoŭ pavialičyłasia, jana ciapier składaje 5,8 młn. Stareńnie nasielnictva charakternaje ciapier dla ŭsich jeŭrapiejskich krainaŭ. Zazvyčaj kažuć pra stareńnie nacyi, kali adsotak ludziej z uzrostam zvyš 65 hadoŭ pierasiahaje 7%. U Biełarusi žychary, jakija majuć 65 hadoŭ i bolš, składajuć 1350 młn, — ličby pryblizna supadajuć ź pierapisam 1999 hoda. Na siońniašni momant heta 14% ad ahulnaha nasielnictva respubliki.
U paraŭnańni ź pierapisam 1999 hodu pavialičyŭsia siaredni ŭzrost. Z 37 hadoŭ da 39,5.Demahrafičnaja nahruzka ciapier najnižejšaja za ŭsiu paślavajennuju historyju, adznačajuć u statystyčnym kamitecie. Adnak źmienšyłasia kolkaść asobaŭ nižej pracazdolnaha ŭzrostu, za košt jakich starejšaje pakaleńnie mahło papaŭniacca.
Za apošnija dziesiać hadoŭ uzrasła kolkaść razvodaŭ.
Na ciapierašni momant na 1000 mužčynaŭ prapadaje 1150 žančynaŭ. Statystyčny kamitet adznačaje taksama niedachop niaviestaŭ na siale.
U žycharoŭ Biełarusi pavialičyŭsia uzrovień adukacyi, 90% nasielnictva starejšych za 15 hadoŭ majuć vyšejšuju, siaredniuju albo bazavuju adukacyju. Niepiśmiennych u Biełarusi naličvajecca 30 tysiač, bolšaść ź jakich składajuć invalidy dy ludzi ź psichičnymi adchileńniami.
Asnoŭnaj krynicaju dachodu 45% nasielnikaŭ Biełarusi nazvali pracu. 23% znachodziacca na baćkoŭskim utrymańni, 90% ź ich moładź da 25 hadoŭ.
Apošni pierapis nasielnictva adbyvaŭsia ŭ Biełarusi z 14 pa 24 kastryčnika 2009 hoda. Padčas pierapisu nie zadavalisia tolki pytańni relihijnyja i datyčnyja vieravyznańnia respandenta.
Vyniki pierapisu padličvajucca z dapamohaju kamputarnych sistemaŭ i farmujucca paetapna. Apošnija statystyčnyja dadzienyja majuć być vydadzieny 3 maja 2011 hodu.
