Vodakanał užyvaje aktyvavany vuhal dla zmahańnia z vodraściami, što źjavilisia ŭ vodapravodzie praz anamalnuju śpioku.
U redakcyju «NN» źviarnuŭsia čytač Uładzimir Asaułaŭ, jaki žyvie ŭ Maskoŭskim rajonie stalicy na vulicy Lubimava.
Pavodle słovaŭ spadara Asaułava, u jaho domie ŭžo čaćviorty dzień zapar ciače brudnaja vada karyčnievaha koleru. Jak chałodnaja, tak i haračaja. Na ŭsie zvaroty ŭ ŽESie tolki pakazvajuć telefanahramu ź Minskvodakanała. I abiacajuć, što ŭ bližejšy čas vada budzie mieć narmalny koler.
«Ja nie chaču heta ciarpieć. My ŭsie niekatory čas tamu samastojna pamianiali vadapravodnyja truby ŭ budynku. My płacim za pitnuju vadu, a nie za techničnuju», — raspavioŭ «NN» Uładzimir Asaułaŭ.
U 99-m ŽESie, jaki absłuhoŭvaje rajon vulicy Lubimava, karespandentu «NN» taksama začytali telefanahramu i paraili źviartacca ŭ vadakanał. Tam udakładnili što koler vady ŭ Maskoŭskim rajonie Minska nasamreč moža adroźnivacca ad zvyčajnaha. Patłumačyli heta pryčynami bijałahičnaha charaktaru i zapeŭnili, što nijakaj škody zdaroŭju takaja vada nie moža nanieści. Paabiacali taksama, što ŭ bližejšyja dni vada iznoŭ stanie biaskolernaj.
Bolš padrabiazna situacyju «NN» prakamientavaŭ namieśnik kiraŭnika minskaj vadapravodnaj sietki Anatol Čarnamorac: «Praz anamalna vysokuju tempieraturu u vadzie źjavilisia sinie-zialonyja vodaraści. Pry kantakcie z azonam, jaki vykarystoŭvacca dla ačystki vady, jany prydajuć joj karyčnievaje adcieńnie. Kab źmienšyć nastupstvy, my pačali vykarystoŭvać aktyvavany vuhal zamiest azona. Adnak chaču zaznačyć, što vada była i zastajecca prydatnaj dla pićcia». A.Čarnamorac taksama zaznačyŭ, što sam žyvie ŭ takim rajonie Minska, dzie vada nabyła niepryjemnaje adcieńnie:
«Ja sam u Malinaŭcy žyvu. U nas niekalki dzion takoje nazirałasia, adnak užo siońnia ŭsio narmalna. U bližejšyja dni situacyja narmalizujecca i ŭ inšych rajonach horada.
Našy słužby pastajanna kantralujuć jakaść vady — jana zastajecca prydatnaj da ŭžyvańnia navat niehledziačy na takoje adcieńnie».
