Nabyŭ zakonnuju moc pryhavor pa rasśledavanaj prakuraturaj Minskaj vobłaści kryminalnaj spravie pa abvinavačvańni36-hadovaj žycharki Minskaha rajona ŭ sistematyčnych ździekach, a zatym u naŭmysnym zabojstvie svajoj dvuchhadovaj dački.
Jak paviedamiła staršy pamočnik prakurora vobłaści Taćciana Kalinina, žančyna pryznanaja vinavataj u tym, što z sakavika pa maj 2009 hoda, znachodziačysia doma ŭ vioscy Navasielle, nieadnarazova źbivała svaju małaletniuju dačku, nanosiła joj šmatlikija ŭdary rukami, remieniem i inšymi pradmietami pa hałavie i inšych častkach cieła, a taksama vyvodziła dziaŭčynku na bałkon i pakidała tam jaje raspranutuju na chałodnym pavietry praciahły čas.
3 červienia 2009 hoda žančyna zabiła dačku z asablivaj žorstkaściu, naniosšy joj nie mienš jak 100 udaraŭ u žyćciova važnyja orhany — hałavu, tułava i kaniečnaści rukami, elektryčnym šnurom, biła hałavoj ab ścianu, krai vanny. Źbitaje dzicia pakinuła ŭ chałodnaj kvatery biez adzieńnia. U vyniku atrymanych cialesnych paškodžańniaŭ dziaŭčynka pamierła na miescy.
Minski abłasny sud, jaki razhladaŭ kryminalnuju spravu, pahadziŭsia z pazicyjaj dziaržabvinavaŭcy i kvalifikavaŭ dziejańni abvinavačanaj pa č. 2 art. 154 KK (ździek) i pa p.p. 2 i 6 č.2 art. 139 KK (naŭmysnaje zabojstva z asablivaj žorstkaściu, jaŭna małaletniaj, jakaja znachodziłasia u biezdapamožnym stanie). Žančyna pryhavoranaja da pazbaŭleńnia voli terminam na 21 hod.
Akramia taho, pa hetaj spravie za ździek ź dziciaci i nieakazańnie jamu dapamohi, jakoje znachodziłasia ŭ niebiaśpiečnym dla žyćcia stanie, da dvuch hadoŭ pazbaŭleńnia voli asudžany sužyciel abvinavačanaj, jaki taksama sistematyčna źbivaŭ dziaŭčynku.
