Biełaruś nikoli nie mieła na mecie škurnyja intaresy, raźvivajučy Mytny sajuz Biełarusi, Rasii i Kazachstana i idučy na intehracyju, u tym liku ŭ Sajuznaj dziaržavie.
Pra heta siońnia zajaviŭ kiraŭnik Biełarusi Alaksandr Łukašenka na sustrečy z adkaznym sakratarom Kamisii Mytnaha sajuza Siarhiejem Hłaźjevym.
Pavodle słoŭ kiraŭnika dziaržavy, biełaruski bok nie vinavaty ŭ tym, što «ŭ nas u Sajuzie Biełarusi i Rasii nie ŭsio, miakka kažučy, atrymlivajecca». «U nas i resursaŭ niama, i nie było, kab tarmazić Sajuz Biełarusi i Rasii. Naohuł jon stvaraŭsia, kab pakazać prykład, pakul atrymlivajecca naadvarot.
Tamu, kali jość mahčymaść rušyć napierad u niejkich inšych intehracyjnych utvareńniach, Biełaruś nikoli nie budzie hetamu pieraškadžać»,
— skazaŭ Alaksandr Łukašenka.
Pry hetym jon adznačyŭ, što biełaruski bok budzie zychodzić, u tym liku sa svaich nacyjanalnych intaresaŭ, u toj čas jak inšyja dziaržavy ŭ asnovu staviać tolki nacyjanalnyja intaresy. «Kali nam adkryta pačynajuć pry hetym demanstravać, što my tam na łaŭcy zapasnych, my z takim padychodam nie zhodnyja i nakolki heta mahčyma, kab nie tarmazić hetyja pracesy, zmahajemsia z hetym, — adznačyŭ biełaruski lider. — Kali my ŭbačym, što heta absalutna nieprymalna dla nas, my budziem šukać inšyja šlachi».
Alaksandr Łukašenka padkreśliŭ, što biełaruski bok absalutna nie źbirajecca tarmazić tyja pracesy, jakija pačalisia, adnak, niaŭchilna vykonvajučy dasiahnutyja damoŭlenaści, budzie patrabavać hetaha ž i ad svaich partnioraŭ. Kamiencirujučy prahučaŭšuju raniej rytoryku, što kali Biełaruś nie dałučycca da Mytnaha sajuza, «to my vas tut nachilim», Alaksandr Łukašenka skazaŭ:
«Jak ža vy nachilicie, kali my z Rasijaj u hetym płanie vielmi daloka zajšli i jość adpaviednyja dahavory. Jak ža možna vybudavać hranicu pamiž Biełaruśsiu i Rasijaj? Tady treba denansavać usie dahavory, jakija ŭ nas jość».
Na zakančeńnie kiraŭnik dziaržavy jašče raz adznačyŭ, što na siońniašni dzień Mytny sajuz Biełarusi vialikaj vyhady pakul nie prynios, taksama jak i škody. «My pracujem na toje, znachodziačysia z režymie čakańnia, kab było lepš», — dadaŭ biełaruski lider.
