U kancy červienia šerah ŚMI raspaŭsiudziŭ infarmacyju ab tym, što haradskaja tapanimičnaja kamisija Hrodzienskaha harvykankama prapanavała nadać adnoj z centralnych vulic Hrodna imia Vasila Bykava. Tady paviedamlałasia, što hetaje pytańnie budzie razhledžana na bližejšym pasiedžańni harvykankama.
Takoje pasiedžańnie adbyłosia 21 lipienia, adnak pytańnie ab vulicy imia Vasila Bykava na im navat nie abmiarkoŭvałasia.Ab hetym «NN» paviedamiŭ kiraŭnik adździeła kultury hrodzienskaha harvykankama Vital Mamačkin. «My abmiarkoŭvali pytańnie pavieličeńnia płoščy muzieja Vasila Bykava. Pryniali rašeńnie vydzielić jašče adzin pakoj pa tym ža adrasie — Savieckaja, 31.
Pytańnie ab nadańni adnoj z centralnych vulic Hrodna imia Vasila Bykava nie ŭzdymałasia. Zrazumiejcie — heta doŭhaja sprava. Spačatku tapanimičnaja kamisija budzie abmiarkoŭvać, a potym inšyja struktury»,— paviedamiŭ u razmovie z karespandentam «NN» čynoŭnik.
Razam z tym, u Hrodna ŭžo pačali cyrkulavać čutki, što raniejšaje rašeńnie tapanimičnaj kamisii harvykankama vyklikała niezadavolenaść u Minsku, ab čym centralnyja ŭłady nieadkładna paviedamili hrodzienskim. Takim čynam raniejšaje rašeńnie tapanimičnaj kamisii stała nieaktualnym.
Nahadajem taksama, što na minułym tydni aktyvistami kampanii «Havary praŭdu» ŭ Hrodzienski harvykankam byli padadzienyja bolš čym 7 tysiač podpisaŭ žycharoŭ Hrodna, jakija chacieli b bačyć u svaim horadzie vulicu imia Vasila Bykava. Adkaz haradzienskich čynoŭnikaŭ maje źjavicca na praciahu miesiaca.
