Siońnia nivodzin piknik nie abychodzicca biez płastykavaha adnarazovaha posudu. Jon lohki, zručny, i, što niemałavažna, — jaho nie treba myć. Ale jość u takoha posudu adzin vielmi surjozny minus: jon moža być niebiaśpiečnym dla zdaroŭja.
Zdavałasia b, što moža być praściej, čym znajści posud dla piknika (dy i nie tolki dla piknika). Zajšoŭ u kramu, uziaŭ upakoŭku adnarazovych płastykavych talerak, videlcaŭ i h.d. Vykarystaŭ, vykinuŭ — voś i ŭsio. Ale, na žal, charčovy płastyk, ź jakoha vyrablajuć taki posud, nie taki ŭžo i biaskryŭdny. Z płastykavaha posudu ŭ pradukty charčavańnia mohuć traplać śpiecyjalnyja dabaŭki, jakija vykarystoŭvajuć pry vyrabie płastyku dla daŭhaviečnaści materyjału. Źjaŭlajučysia taksičnymi, jany i nanosiać škodu zdaroŭju. Davajcie raźbiaromsia, jaki płastykavy posud moža być niebiaśpiečny i čym.
Pry nabyćci płastykavaha posudu ŭvažliva pryhledźciesia da nadpisaŭ na im. Firma‑vytvorca pavinna paznačyć kod, nazvu materyjału, ź jakoha vyrableny tavar, a taksama — i heta abaviazkovaja ŭmova — dakładna śfieru prymianieńnia tavaru (dla chałodnych, haračych, sypučych materyjałaŭ, vadkaści i h.d.). Na płastykavych łyžkach, videlcach i nažach takaja infarmacyja, jak praviła, pavinna być paznačana na ahulnaj upakoŭcy.
Płastykavaja azbuka dla spažyŭca
PS — hetyja łacinskija litary aznačajuć, što ŭ skład posudu ŭvachodzić polistyroł. Mienavita tamu taki charčovy płastyk možna vykarystoŭvać tolki dla chałodnych praduktaŭ. Pry kantakcie z haračym, u tym liku i pry razahravańni ježy ŭ mikrachvaloŭcy, posud vydzialaje taksičny styroł. Heta ž škodnaje rečyva pačynaje vydzialacca i pry kantakcie sa śpirtnymi napojami. Styroł maje ŭłaścivaść nazapašvacca ŭ piečani i nyrkach i moža pryvieści da ich zachvorvańniaŭ, u pryvatnaści da cyrozu. Akramia taho, moža abvastrycca alerhija, paciarpieć niervovaja sistema. Posud z polistyrołu krochki, vielmi lohka łomicca i pry kantakcie z haračym čaściej za ŭsio defarmujecca.
RR — u skład posudu ŭvachodzić poliprapilen. Taki płastyk možna vykarystoŭvać dla haračaj ježy i napojaŭ — jon vytrymlivaje tempieraturu bolš za +100 hradusaŭ pa Celsiju. Z poliprapilenavych kubačkaŭ možna pić haračuju harbatu abo kavu, u takich talerkach možna razahravać ježu ŭ mikrachvalevaj piečy. Ale, na žal, z ałkaholem poliprapilen taksama nie siabruje. Pry kantakcie z mocnymi napojami posud pačynaje vydzialać farmaldehid abo fienoł. Heta kancerahien, ad jakoha pakutujuć nyrki, piečań, orhany zroku. Posud z poliprapilenu dobra trymaje ciapło i nie łomicca — tolki hniecca.
Trochvuholnik z 3 strełak — znak druhasnaj pierapracoŭki syraviny. Try strełki aznačajuć zamkniony cykł: stvareńnie — prymianieńnie — utylizacyja, h. zn. upakoŭka (u našym vypadku posud) prydatnaja dla dalejšaj pierapracoŭki. Usiaredzinie trochvuholnika zvyčajna adna abo dźvie ličby, jakija śviedčać pra typ materyjału (naprykład, 1‑19 — płastyk).
Značok «kubak‑videlec» śviedčyć ab prydatnaści płastykavych vyrabaŭ dla kantaktu z praduktami. Kali taki značok pierakreśleny, to ježu ŭ ich zachoŭvać nielha.
Karysnyja parady
Kali markiroŭki niama ŭ pryncypie, to lepš ustrymacca ad nabyćcia padobnaj pradukcyi.
Śpirtnoje z adnarazovych kubačkaŭ pić nielha. U lubym płastyku ŭtrymlivajucca taksičnyja rečyvy, jakija ŭ zvyčajnych chałodnych napojach nie rastvarajucca, a voś u ałkaholi — navat vielmi dobra.
Ni ŭ jakim razie nie ŭzdumajcie paśla piknika spalvać adnarazovy posud. Dym, jaki pry hetym vydzialajecca z płastyku, atrutny.
Pastarajciesia paźbiahać kaviarniaŭ, dzie ježu padajuć u płastyku. Kali ŭžo tak atrymałasia, nie palanujciesia pahladzieć, ci pravilna tut karystajucca płastykavym posudam.
Źviarnicie ŭvahu: u niekatorych aŭtamatach dla raźlivu napojaŭ vykarystoŭvajucca kubački z polistyrołu. Heta značyć, haračuju kavu, kapučyna abo harbatu ź ich pić nielha.
Nie zabyvajciesia, što spałučeńnie «adnarazovy posud» aznačaje: taki posud možna vykarystoŭvać usiaho tolki raz. Kali vy nabyli, naprykład, hazavanuju vadu ŭ płastykavaj butelcy, to paśla zakančeńnia napoju i butelka pavinna adpravicca ŭ viadro dla śmiećcia.
Nie varta vykarystoŭvać jaje jak sasud dla zachoŭvańnia małaka, kvasu i h.d.
Bo vysokaja tempieratura praduktaŭ abo pavietra, praciahły kantakt z charčovymi praduktami, ultrafijaletavyja promni i kisłarod sadziejničajuć «stareńniu» palimiernych materyjałaŭ. Jak vynik, ź ich vydzialajucca rečyvy, škodnyja dla arhanizma čałavieka, jakija pierachodziać u charčovyja pradukty, što zachoŭvajucca ŭ takoj tary. Heta značyć małako, kampot, kvas abo inšyja pradukty stanoviacca taksičnymi i niebiaśpiečnymi dla čałavieka.
