Taćciana Vułaston. Fota: World Snooker Tour
Biełaruska Taćciana Vułaston sudzić paŭfinalny matč čempijanatu śvietu pa snukiery.
Uradženka Pinska pracuje na pajadynku Devida Hiłbierta i Kajrena Uiłsana. Heta pieršy paŭfinał čempijanatu śvietu ŭ jaje sudziejskaj karjery.
Taćciana Tarčyła naradziłasia ŭ Pinsku, skončyła BDEU, dzie atrymała stupień mahistra ekanomiki. Niekatory čas jana i vykładała ŭ hetym univiersitecie.
Paralelna Taćciana budavała karjeru sudździ ŭ snukiery. Jana prajšła šlach ad nacyjanalnych spabornictvaŭ unutry Biełarusi da mižnarodnych miejdžaraŭ. U 2010 hodzie Taćciana stała pieršaj refiery z Uschodniaj Jeŭropy, jakaja sudziła paŭfinał turniru jeŭrapiejskaha tura. Pryčym jana sudziła matč z udziełam supierzorki suśvietnaha snukiera — da taho času ŭžo trochrazovaha čempijona śvietu Džona Chihinsa.
U 2011 hodzie Taćciana vyjšła zamuž za anhlijskaha snukierysta Biena Vułastona i pierajechała žyć u Vialikabrytaniju. U 2015 hodzie biełaruska ŭpieršyniu sudziła rejtynhavy turnir suśvietnaha tura Welsh Open. Praź siem hadoŭ tam ža Taćciana ŭpieršyniu pracavała na finale. Letaś biełaruscy davieryli finał British Open pamiž supierzorkami — trochrazovym čempijonam śvietu Markam Uiljamsam i čatyrochrazovym čempijonam Markam Sełbi.
Na čempijanacie śvietu Taćciana ŭpieršyniu źjaviłasia ŭ 2020 hodzie, z tych časoŭ sudzić rehularna. Na apošnich dvuch čempijanatach śvietu biełaruska pracavała na čverćfinałach. Ciapier joj davieryli paŭfinał hałoŭnaha turniru pa snukiery.
Čytajcie taksama:
15-hadovaja biljardystka Saša Karniej: «Ja lublu Biełaruś, ale žyć płanuju ŭ Amierycy»
Biełaruski majstar pokieru znoŭ vyjhraŭ na turniry bolš za miljon dalaraŭ
