Alaksiej zajmajecca adnaŭleńniem i prodažam hruzavych mašyn, jakija zvyčajna kuplaje z vajskovaha zachoŭvańnia abo ź niezapatrabavanych zapasaŭ MNS. Niekatoryja aŭto, naprykład, HAZ-66, pieraroblenyja ŭ aŭtadom, zastajucca ŭ asabistym karystańni. Dziońnik kamiercyjnych i asabistych prajektaŭ Alaksiej viadzie na sajcie drive2.ru. asabliva jon vyłučaje svaje lubimyja hruzavyja «Miersiedesy». Kastamizavany BRDM-2 staić asabniakom.
BRDM-2 1984 hoda vypusku, nabytaja ŭ 2021 hodzie
Ruchavik 5,5 ł bienzinavy, 140 k.s.
Vaha — 8 ton
Miechaničnaja karobka pieradač, poŭny pryvad
Paliva — 30 ł/100km u ruchu pa šašy, na biezdaražy — bolš
Maksimalnaja chutkaść — 90 km/h
«Takaja mašyna cikavaja tym, što jana ŭjaŭlaje saboj simbijoz hruzavoha aŭtamabila i amfibii. Hruzavik plus paŭnavartasny katar z kajutaj, — raspaviadaje Alaksiej, — ja hladzieŭ na tym ža drive2 błohi ludziej, jakija vałodajuć takoj technikaj, zahareŭsia.
Za dva hady, što vybiraŭ sabie takuju mašynu, razhledzieŭ čatyry varyjanty. Tolki adzin BRDM byŭ u bolš-mienš prystojnym stanie, ale, na žal, jon užo nie moh płavać.
Mašyna, jakuju ŭ vyniku kupiŭ u 2021 hodzie, vypuščanaja ŭ 1984 i mieła prabieh 300 km. Na joj byli ŭsie zavodskija etykietki. Vyjšła z vytvorčaści i 30 hadoŭ prastajała biez spravy».
Braniavik, nabyty z zachoŭvańnia MNS, byŭ demilitaryzavany. Ź jaho źniali ŭzbrajeńnie, prybory načnoha bačańnia, pieryskapičnyja prybory.
Dla pačatku z mašyny śpiłavali dach, kab zrabić novuju nadbudovu. Da hetaha ŭvachod u aŭto byŭ mahčymy tolki praz dva luki na dachu. U vyniku madyfikacyi źjaviŭsia bakavy ŭvachod. A taksama dadatkovyja vokny i lusterki — inakš vadzić mašynu było b niemahčyma. Pry madelavańni kabiny aryjentavalisia na madel usiudychoda 60.03 «Kajman-PR» (Palaŭničy-Rybak), jaki vypuskaje AAT «140-y ramontny zavod». Takija mašyny jakraz pryznačajucca dla pieravozki pasažyraŭ i hruzaŭ pa biezdaražy.
Nad amfibijaj pracavali jašče try čałavieki. Pierabrali ruchavik, karobku pieradač, źmianili humovyja detali.
Uładalniki niekatorych madyfikacyj savieckich BTR-aŭ pišuć pra toje, što pa techničnuju infarmacyju ab pryładzie im davodziłasia źviartacca ŭ archivy. Adnak u hetym vypadku abyšłosia.
Pa-pieršaje, BRDM-2, pa słovach Alaksieja, na 80% padobny na znajomy HAZ-66. Ruchavik — taki ž, tolki bolš mahutny. Karobka pieradač — takaja ž, tolki ŭ advarotny bok. Masty — amal takija ž, tolki zakrytyja listom brani.
Pa-druhoje, da branievika pry prodažy prykładałasia instrukcyja pa ekspłuatacyi techničnaj pryłady: «Tam vielmi padrabiaznyja, pakrokavyja tłumačeńni. Kab luby sałdat terminovaj słužby moh papravić mašynu ŭ poli.
Litaralna: u takim vypadku vaźmicie try adviortki takija, dva klučy takija. Pakładzicie źleva ad siabie adviortki, sprava klučy. Zrabicie toje. Praviercie, kab źleva byli try adviortki, sprava dva klučy. Pratrycie instrumient, viarnicie na miesca».
U mašynie praviedziena aciapleńnie, zrobleny vibra– i hukaizalacyja, ustanoŭleny aŭtamabilnyja siadzieńni dla kiroŭcy i pasažyraŭ zamiest aryhinalnych taburetak: haspadar za vajennaj aŭtentykaj nie hnaŭsia. Zastalisia apošnija kaśmietyčnyja rysy, nakštałt zaciažki prybornaj paneli ekaskuraj.
Dla taho, kab vadzić braniavik, treba mieć pravy traktarysta-mašynista; pryjšłosia zdavać ekzamieny ŭ Dziaržtechnahladzie.
Alaksiej vyrašaje prakacić žurnalista. Pierad źjezdam u voziera kiroŭca ŭzdymaje chvaleadbojnik śpieradu, adkryvaje bronieachovu. Pa piasku mašyna ruchajecca miakka, nie buksujučy. Huk ruchavika nie mianiajecca. Źjezd u vadu adbyvajecca jak by niezaŭvažna. Jon bačny tolki voku, inšyja orhany pačućciaŭ jaho nie zaŭvažajuć. Uražańnie — byccam znachodzišsia ŭ kampjutarnaj hulni dzivosnaj dakładnaści.
BTR-amfibija zdolny «zavisnuć» u vadzie na niekatory čas. Pasažyr moža vyjści na dach i ahledzieć bierah z vady. Vyjezd na sušu adbyvajecca hetak ža miakka i niezaŭvažna, jak i źjezd ź jaje. Zabiahajučy napierad — šturm Biareziny ad bieraha da bieraha prajšoŭ hetak ža hładka i biez adčuvalnych namahańniaŭ, jak i płavańnie pa voziery.
Pry pavarocie da voziera Bieły Bierah branieviku napiarejmy padbieh mužčyna i paprasiŭ vyciahnuć jaho mašynu na darohu. Pa słovach Alaksieja, takija prośby pastupajuć pastajanna. Kiroŭcy lehkavikoŭ rehularna spalvajuć sčapleńnie ŭ viazkim piasku nad Biełym Bieraham.
«Ciapier parviom jaho tros i pajedziem dalej. Svoj, mocny, ja nie zachapiŭ», — kamientuje kiroŭca branievika. Adnak tros rviecca tolki raz, lehkavik ščaśliva zajazdžaje na darohu.
… Za dva hady Alaksiej na svaim branieviku najeździŭ 3800 km. Nie tak i mała, kali ŭličyć, što heta mašyna vychadnoha dnia. Na zadnim siadzieńni lažać vyratavalnyja kamizelki dla žonki i dziaciej, u sałonie svabodna źmiaščajucca składzienyja šezłonhi: adpačyvać — tak z kamfortam.
Vyjazdžać voś tak na pryrodu — napeŭna, heta samaja lepšaja piensija dla luboha BRDM-2.
