Padčas pieratrusu. Fota: AP Photo/Martin Mejia
U rejdzie ŭdzielničali kala 40 supracoŭnikaŭ palicyi i prakuratury. Ich zadačaj było znajści hadzińnik Rolex, jaki Bałuarte nibyta nie zadekłaravała. Tranślacyju pieratrusu vioŭ miascovy telekanał «Łacina».
Miarkujučy pa kadrach videa, uradavyja ahienty sa śledčaj hrupy ŭvarvalisia ŭ rezidencyju prezidenta ŭ Limie, kali samoj kiraŭnicy dziaržavy nie było doma. Jany pierakryli aŭtamabilny ruch na vulicy pierad asabniakom i akružyli budynak.
U zajavie palicyi ŭdakładniajecca, što rejd pravodziŭsia «z metaj pieratrusu i vyjemki» dokazaŭ pa spravie ab karupcyi i byŭ sankcyjanavany sudovymi orhanami pa zapycie Hienieralnaj prakuratury.
Rasśledavańnie ŭ dačynieńni da Bałuarte było pačata ŭ sakaviku 2024 hoda paśla taho, jak miascovaje vydańnie La Encerrona paviedamiła, što prezident nosić roznyja hadzińniki Rolex na aficyjnych mierapryjemstvach. Adkazvajučy na pytańnie ab tym, jak na dziaržaŭnuju zarpłatu možna dazvolić sabie takija darahija aksiesuary, lidarka Pieru zajaviła, što hetyja kupli — vynik jaje «ŭpartaj pracy z 18 hadoŭ», i zaklikała ŚMI nie ŭłazić u jaje asabistaje žyćcio.
Hienieralny prakuror Pieru Chuan Vilena paviedamiŭ, što Bałuarte atrymała pozvu ŭ sud, ale paprasiła adkłaści jaŭku na dva tydni ŭ suviazi z prezidenckimi abaviazkami. Jon padkreśliŭ, što kiraŭnica dziaržavy abaviazanaja supracoŭničać sa śledstvam i dać dokazy lehalnaha nabyćcia darahich hadzińnikaŭ. Vilena taksama zajaviŭ, što Bałuarte pavinna pradjavić śledstvu try hadzińniki Rolex i pieraściaroh prezidentku ad ich źniščeńnia abo ŭtojvańnia.
Pavodle słoŭ prakurora, dekłaracyi ab dachodach i aktyvach kiraŭnicy dziaržavy za apošnija dva hady buduć staranna pravieranyja na pradmiet parušeńniaŭ.
U toj ža čas Bałuarte praciahvaje nastojvać na tym, što nie ździajśniała karupcyjnych złačynstvaŭ. «Ja ŭvajšła ŭ Pałac urada z čystymi rukami i z čystymi rukami vyjdu ź jaho», — zajaviła jana na minułym tydni.
Dzina Bałuarte kiruje Pieru ŭsiaho paŭtara hoda, z 7 śniežnia 2022-ha. Da taho jana z 2021 hoda była vice-prezidentkaj i ministarkaj raźvićcia i sacyjalnaj intehracyi Pieru, a pierad tym šmat hadoŭ była słužačaj Nacyjanalnaha rehistra identyfikacyi i hramadzianskaha stanu — pieruanskaha anałaha našaha ZAHS.
Čytajcie taksama:
«Ja ŭpieršyniu ŭ žyćci ŭbačyŭ pistalet kala svajoj hałavy». Biełarusa abrabavali ŭ Buenas-Ajresie
