Kultavy surok z Panksantoni ŭ Piensilvanii ŭ minułym hodzie. Fota: Barry Reeger / AP
U mas-kultury siońnia — Dzień surka, jaki staŭ viadomy adnajmiennamu filmu ź Biłam Miurejem i surkom Fiłam u hałoŭnych rolach. Tradycyi dastavańnia surka ŭ štacie Piensilvanija ŭžo amal 135 hadoŭ.
Ličycca, što viasna budzie rańniaj, kali surok Fił vylezie z nary i nie spałochajecca svajho cieniu (budzie pachmurna), inakš viasny pryjdziecca čakać jašče šeść tydniaŭ.
Ale ŭ nas zusim inšaje nadvorje i klimatyčnyja ŭmovy. Jak być? U katalikoŭ (i pravasłaŭnych, jakija žyvuć pa novajulijanskim kalendary) siońnia — Hramnicy i svaje prykmiety. Va Ukrainie varožać pa surkach Vikienciju i Cimko.
U zaaparku «12 miesiacaŭ» Kijeŭskaj vobłaści Vikiencij pračnuŭsia rana. Kala dvuch tydniaŭ tamu jon vyjšaŭ sa svajoj chatki i pačaŭ hulać pa valjery. Značyć, viasna va Uschodniaj Jeŭropie budzie rańniaj?
Jak adznačajuć supracoŭniki zaaparka, žyvioła moža pračnucca raniej, kali siaredniesutačnaja tempieratura pieravyšaje nul hradusaŭ i idzie na pavyšeńnie. Adnak całkam imavierna, što surok moža viarnucca ŭ śpiačku, kali pachaładaje.
Taksama niekalki hadoŭ sačyli za surkom Cimko na Charkaŭščynie. Dva hady tamu heta častka Charkaŭščyny trapiła pad akupacyju, potym terytoryju vyzvalili. Jak siońnia budzie siabie vieści Cimko?
U Litvie ŭ Žaharskim rehijanalnym parku žyvie barsuk. 25 studzienia ŭ Litvie adznačałasia siaredzina zimy. U hety dzień barsuk vyjšaŭ z nary i pačaŭ hulać pa vakolicach, značyć, viasna ŭ našym rehijonie budzie rańniaj. Heta navat źniali na videa.
U Biełarusi na siońniašni dzień byli svaje prykmiety. «Jak na Hramnicy pievień napjecca vadzicy, dyk na Jurja [6 traŭnia pa novym styli] voł najesca travicy» (kali siońnia adliha, to i viasna budzie rańniaj),
«Jak na Hramnicy adliha, z uradžaju budzie chviha» (kali siońnia adliha, to viasna rańniaja, a jana nie spryjaje dobramu ŭradžaju, bo rana vysychaje ziamla).
Što siońnia z nadvorjem?
Čakajecca vobłačna z prajaśnieńniami. Miescami nievialikija apadki (śnieh, mokry śnieh, doždž). Maksimalnaja tempieratura pavietra 0..+ 5°S. U Minsku ranicaj 0..+1°S, dniom + 1..+3°C, viečaram 0..+1°S.
Adliha! Značyć viasna budzie rańniaj.
Čytajcie taksama:
Luty pačniecca z dosyć niepryjemnaha i niekamfortnaha nadvorja
