Ad zaŭtra, 15 traŭnia, i ažno da 2 žniŭnia tramvajem da čyhunačaha vakzała ŭžo nie dajedzieš.
Pryčynaju — ramont mosta cieraź Śvisłač na Pieršamajskaj vulicy. Z troch maršrutaŭ, što chadzili pa im, dva skasujuć — №4 i №7.
Nie budzie jak dajechać da Kastryčnickaj vulicy j tramvaju maršrutu №2 — jaho taksama začyniać.
Zastaniecca pracavać «adzinka», ale ŭ skaročanym dy źmienienym vyhladzie: ad vulicy Źmitraka Biaduli zamiest Pieršamajskaj jana pojdzie pa Čapajeva, Płatonava, Daŭhabrodskaj da prypynku «Vulica Bataničnaja». Tam raźvierniecca ŭ depo j pakiruje nazad.
Tym časam zamiest źniatych tramvajaŭ ad Biaduli da DS «Družnaj» puściać časovy aŭtobus №146.
Daviadziecca abjazdžać most na Pieršamajskaj i 57-mu maršrutu aŭtobusa: z Pulichava jon budzie pavaročvać nie naleva, a naprava na Pieršamajskuju, i rabić kruh da Janki Kupały pa Zacharava dy praśpiekcie Niezaležnaści.
Papiaredni raz ruch praz most na Pieršamajskaj na doŭhi čas začyniali ŭ siaredzinie 90-ch hadoŭ.
Pryhadajma, što ad pačatku traŭnia da 2 lipienia idzie ramont tramvajnych kalain na Łahojskim trakcie i tramvai №1 i №5 chodziać tolki da kalca na Vałhahradskaj. A maršruty №6 i №11 nie pracujuć zusim. Ad Karbyšava da Vałhahradskaj z razvarotam na Čajkoŭskaha achvotnych padvozić časovy aŭtobus №141V.
Takim čynam, u Minsku zastaniecca mienš jak pałova tramvajnych maršrutaŭ:
• №1 — Vałhahradskaja — Bataničnaja (źmienieny i skaročany);
• №3 — Voziera — Sierabranka;
• №5 — Voziera — Vałhahradskaja (skaročany);
• №8 — Vałhahradskaja — Sierabranka
• №10 — Voziera — pł. Pieramohi (na leta zvyčajna začyniajecca).
