Pieršy raz za 62 hady isnavańnia kinafest u Kannach raspačniecca multfilmam.
«Uhoru» (Up) – animacyjnaja stužka amierykanskaha režysiora Pita Doktera. Siužet: stary spraŭdžvaje maru ab padarožžy ŭ pavietry, pryviazaŭšy tysiačy pavietranych bałonikaŭ da svajoj chaty. Dziakujučy ahučvańniu ŭ multfilmie vakalnych numaroŭ, na čyrvony dyvan Kannaŭ stupić Šarl Aznavur.
Akramia francuskaha šansańje ŭ Kanny pryjedzie taksama Kvientyn Tarancina ź filmam «Nieprykmietnyja vybladki» (Inglourious Bastards), Łars fon Tryjer z trymcieńnikam «Antychryst», Džejn Kempijon z «Jarkaj zorkaj» (mieładrama pra anhielskaha paeta), Kien Łoŭč sa spartovaj trahikamiedyjaj «Šukajučy Eryka» (Looking for Eric), a taksama Piedra Almadavar z «Razarvanymi abdymkami» (Los Abrazos Rotos).
Usiaho ŭ asnoŭnaj prahramie buduć prezientavanyja 20 stužak. Pa‑za konkursnaj prahramaj zastaŭsia film, jaki , peŭna, zdolny nahnać chvalu ŭ Kanskaj ryvjery – heta stužka Tery Hiljama «Fantazium doktara Parnasa» (Imaginarium Of Doctor Parnassus), pra ŭhodu dyrektara vandroŭnaha cyrka z Šatanam.Tut‑ aktorskaje suzorje: ad Džoni Depa i Krystofiera Płamiera da sipataha vykanaŭcy bluzaŭ Toma Ŭetsa.
Ale podych kryzisu łunaje ŭ kanskim pavietry. Na kiniematahrafičnym kirmašy, jaki zazvyčaj ładzicca padčas kinafestu, skasavanyja sotni kantraktaŭ na prakat filmaŭ. Dyrektar fiestyvalu Tejry Prema kaža, što sioleta adbudziecca paraŭnalna mienš uračystaściaŭ. «Moža, jano da lepšaha, — zaznačyŭ Prema francuzskaj presie, — viečarynaŭ i ŭračystaściaŭ na feście zaŭsiody było až zanadta. Musić, hetym razam my zdolejem zasiarodzicca na filmach, a nie na zorkach».
Ale ź inšaha boku, dla halivudcaŭ Kanski kinafest – vyklučnaja nahoda inšych pahladzieć i siabie pakazać. Navat sioleta, u hod vialikaha ekanamičnaha spadu, byli zahadzia ŭziatyja ŭ arendu niekalki dziasiatkaŭ jachtaŭ i byli zakazany sotni šykoŭnych numaroŭ dla takich kinazorak, jak Džoni Dep, Pieniełopa Kruz i Bret Pit. «Dyjor» i «Šanel» užo fihurujuć jak vytvorcy sukniaŭ dla aktorak Šarlin Teron i Robin Rajt Pen.
