Šerah biezymiennych skvieraŭ i parkaŭ u Minsku atrymali nazvu.
Jak paviedamili BiełaPAN u pres‑słužbie Minharvykankama, takoje rašeńnie na pasiadžeńni 6 maja pryniała Kamisija pa najmienavańni i pierajmienavańni praśpiektaŭ, vulic i inšych častak Minska.
Biezymienny skvier u miežach pr.Mašerava — vuł.Kujbyšava — terytoryja Hałoŭnaha vajennaha špitala Ministerstva abarony budzie zvacca skvier «Špitalny».
Biezymienny skvier u miežach vuł.V.Charužaj — TC «Lusterka» — Dom mebli nazvany skvieram «Kamaroŭski».
Biezymienny skvier kala kaledža finansaŭ i bankaŭskaj spravy pa vuł.Čyrvonaj, 17 u budzie zvacca skvieram «Čyrvony». Biezymienny skvier u miežach vulic Kupryjanava — K.Libkchniechta — zav.Damašeŭski ciapier zaviecca skvier «Luteranski». Hety skvier ź`iaviŭsia na miescy źniesienych u 1970‑ia hady Luteranskich mohiłak, što isnavali ŭ Minsku ź siaredziny 19‑ha stahodździa.
Biezymienny skvier u miežach vuł.Kupryjanava — žyłaja zabudova — vuł.Vołacha budzie nazyvacca skvier «Małamiadźviežynski». Hety skvier ź`iaviŭsia na miescy vioski Małoje Miadźviedzina, jakaja źnikła z karty horadu ŭ 1970‑ia hady.
Kamisija taksama vyrašyła prysvoić nazvu biezymiennamu skvieru ŭ miežach vuł.Kalvaryjskaj — prajezdam Kalvaryjskim i mohiłkami «Kalvaryja» — skvier «Kalvaryjski».
Biezymiennamu skvieru ŭ miežach vykankama Minskaha rajona — vulic Alšeŭskaha i Kalvaryjskaj — skvier «Alšeŭski». Skvier ziaviŭsia na miescy źniesienaj u 1960‑ia hady vioski Olšava.
Zdabyŭ svaju nazvu i skvier u miežach vuł.Kujbyšava — E.Paškievič — M.Bahdanoviča — Janki Kupały — «Trajeckaja hara». Trajeckaja hara — histaryčnaja nazva byłoj płoščy, jakaja źnikła ŭ 1930‑ia hady paśla taho jak na joj pabudavali Nacyjanalny akademičny Vialiki teatr opiery i baleta Biełarusi.
Svaje nazvy atrymali zony adpačynku, što prajektujucca. Zaprajektavany park u mikrarajonie «Sucharava‑5» kala rečki Kačynka budzie zvacca park «Dziviviełka». Na terytoryi budučaha parka znachodzicca abmialełaja rečka, jakaja ŭ staryja časy mieła nazvu Dziviviełka.
Parkavaja zona ŭ składzie łandšaftna‑rekreacyjnych terytoryj uzdoŭž raki Śvisłač, u miežach vuł.Kamunistyčnaja — vuł.Staražoŭskaja — raka Śvisłač budzie zvacca skvier «Starościnskaja słabada». Starościnskaja słabada — heta nazva staražytnaha minskaha pradmieścia, jakoje isnavała na hetym miescy ŭ 16‑m — pieršaj pałovie 20‑ha stahodździa. Starasta ŭ hady Vialikaha kniastva Litoŭskaha — słužbovaja asoba, jakaja kiravała administracyjnaj akruhaj. Na hetym miescy ŭ 16—18 stahodździ pražyvali ludzi, jakija arandavali ŭ minskaha starasty ziamlu.
