46-hadovaha Leanida Š. (mužčyna paprasiŭ nie ŭkazvać imia) schapili padčas začystki praśpiekta Niezaležnaści paśla niadzielnaha maršu.
«Ja ŭ niadzielu byŭ la Akademii Navuk — išoŭ kupić kvitki ŭ kinateatry «Kastryčnik», chacieŭ žonku zvadzić. Heta byŭ viečar, prykładna 18:30.
Ja padychodziŭ da pierachodu, tam było šmat ludziej. I raptam padjechali aŭtazaki, ludzi pabiehli. Ja ŭ šoku taksama pabieh — a što było rabić? Ja razhubiŭsia i ŭvohule nie čakaŭ takoha raźvićcia padziej.
Usich schapili. Nu i mianie taksama».
Paśla Leanida razam ź inšymi zatrymanymi dastavili ŭ Leninskaje RAUS.
«Skłali pratakoły, što ja byŭ udzielnikam mitynhu, kryčaŭ, supraciŭlaŭsia pry zatrymańni. Ja napisaŭ, što z pratakołam nie zhodny, što mianie ŭziali vypadkova, — kaža mužčyna. — Ale chaču adznačyć, što ŭ milicyi adekvatna stavilisia, prapanoŭvali i vadu, i ŭ prybiralniu».
Paśla Leanida advieźli ŭ Žodzina. U paniadziełak byŭ sud.
«Ja na sudzie skazaŭ: u mianie zastupnikaŭ niama, ni śviedkaŭ, ni advakata. Budu abaraniać siabie sam.
Sudździa vysłuchała maje pakazańni, skazała, što jany adekvatnyja i što z boku pravaachoŭčych orhanaŭ nie chapaje dokazaŭ majoj viny. Mianie apraŭdali.
Usio było chutka, sud išoŭ chvilin 10-15. Na im vysłuchali tolki mianie, śviedki z boku milicyi nie vystupali.
Mianie vyzvalili, vałanciory sustreli i advieźli dadomu», — zhadvaje Leanid.
Jak sam mužčyna stavicca da mitynhaŭ?
«Niespakojna siońnia. Ja nie razumieju, čym situacyja skončycca, ale chaču, kab usio razruliłasia narešcie. Hałoŭnaje — mirnym šlacham», — kaža Leanid.
