Kala sotni futbalistaŭ biełaruskaj vyšejšaj i pieršaj lih, a taksama biełarusy, jakija hulajuć za miažoj, vystupili ź videa «My suprać hvałtu».
«My zapisali heta videa, tamu što nie možam maŭčać! Maŭčać, kali bjuć našych ludziej, siabroŭ, kaleh. My futbalisty z roznych kamand, ale adnoj krainy. My kirujemsia tolki sumleńniem i nieciarpimaściu da ŭsiaho taho, što adbyvajecca ŭ našaj krainie. My vykazvajem spačuvańni rodnym tych, chto byŭ zabity, chočam vykazać słovy padtrymki ŭsim tym, chto paciarpieŭ, byŭ prynižany, žorstka źbity i skalečany. I zaklikajem: spynicie hvałt!» — havorycca ŭ zvarocie.
Pad im padpisalisia mnohija futbalisty zbornaj: Stanisłaŭ Drahun, Pavieł Niachajčyk, Maksim Bardačoŭ, Andrej Chačaturan i inšyja.
«Naša Niva» źviazałasia z čałaviekam, jaki arhanizavaŭ hulcoŭ vyšejšaj lihi dla zvarotu. Heta dastatakova aŭtarytetny ŭ Biełarusi futbalist, ale jon vyrašyŭ nie nazyvać svajo imia. Pa-pieršaje, jon ličyć nie duža pryhožym pijarycca ŭ takoj situacyi. Pa-druhoje, kiraŭnictva fiederacyi futboła pahražaje jamu prablemami.
«Nie treba kazać, što ja byŭ. Mnohija chłopcy chacieli vykazacca. My, futbalisty, usie viedajem adno adnaho, stasujemsia. Ludzi zapisalisia sami, dobraachvotna. Tak, pramovu prydumali my z žonkaj, jana adkarektavała jaje. U nas była hrupa, u jaje dadavali ludziej, heta i stała kaściakom».
Praź niejki čas daviedalisia, što padobnaja inicyjatyva jość taksama ŭ hulcoŭ pieršaj lihi. Tam arhanizacyjaj zajmałasia byłaja pres-sakratarka kłubaŭ «Lida» i «Smarhoń» Alaksandra Nikituškina. Było vyrašana abjadnać namahańni.
Šmat pytańniaŭ vyklikaje, čamu ŭ hetym videa nie źnialisia hulcy minskaha i bresckaha «Dynama».
«Chłopcy z «Dynama» (Minsk) byli ŭ našaj hrupie, ale ŭsie stali admaŭlacca. Vidać, ich zapałochali niejkimi mierami, zvalnieńniami, moža być. Jany nie rašylisia, možna tak skazać. Minimum try čałavieki płanavali źniacca», — raskazvaje naša krynica.
Što tyčycca «Dynama» (Brest), to tam situacyja bolš składanaja. Adzin ź lidaraŭ kamandy Pavieł Savicki zajaviŭ, što nie čuŭ pra takuju inicyjatyvu, a tak by ŭpisaŭsia, jak i niekatoryja inšyja hulcy.
«Ja asabista ŭ Breście z adnym čałaviekam razmaŭlaŭ, ale jon syšoŭ z hetaj temy. Skazaŭ, što ŭ jaho jość peŭnyja siamiejnyja prablemy, ź im razmaŭlać sensu nie było. Ciapier jany pakryŭdzilisia? Kali zvolnili Chamutoŭskaha (trenier bramnikaŭ bresckaha «Dynama», jaki nie chavaŭ svaju palityčnuju pazicyju — «NN»), to čamu maŭčali? Kali vy chacieli niešta skazać, to vam treba było ŭžo tady skazać, jak mnie zdajecca. My ž nie budziem ich prymušać».
Jość śviedčańni, što pad ciskam admovilisia ad udziełu ŭ roliku hulcy «Viciebska» i «Biełšyny» — im taksama, chutčej za ŭsio, pahražali dyscyplinarnymi mierami.
«U «Ruchu» presujuć chłopcaŭ, jakija źnialisia», — kaža futbalist.
Zatoje suprać hvałtu vykazalisia amal usie lidary BATE. Pa infarmacyi «NN», kiraŭnictva kłuba było nie ŭ zachapleńni ad takoj idei, ale ničoha zrabić było nie ŭ stanie.
«U BATE chłopcy bolš śmiełyja i niezaležnyja. Jany zhadzilisia. Ja ŭ hetym videa ničoha takoha nie baču, ale ŭ nas ciapier ža ŭsio pierapyniajecca i karajecca», — raskazvaje krynica «NN».
Jak uvohule paŭstaŭ zvarot?
«Była inicyjatyva adnaho byłoha hulca zbornaj, jon sabraŭ kantakty kapitanaŭ kamand, ale niešta tam sprava nie pajšła. Tamu ŭzialisia za spravu sami. My chacieli, kab naš zvarot pačuli ŭ MUS, u inšych orhanach, jakija prymajuć rašeńni. Futbalistam niaprosta ŭ hetaj situacyi: maŭčyć ABFF, maŭčać kiraŭniki kłubaŭ. U nas niama nijakaha prafsajuza, było b dobra, kab jon isnavaŭ. Byli sproby jaho stvaryć, ale ŭsio spyniałasia».
Naš surazmoŭca padkreślivaje, nie varta dumać, što futbalisty zastajucca ŭ baku ad padziej u krainie. «Šmat chto z futbalistaŭ pieravodzić hrošy ŭ fondy dapamohi, ale nie kryčyć pra heta. Robić cicha», — raskazali «NN».
