Hieneralny sakratar Arhanizacyi Abjadnanych Nacyjaŭ Antoniju Huteryš zaklikaŭ ułady Biełarusi spynić užyvańnie siły suprać mirnych demanstrantaŭ, raśśledavać źviestki ab katavańniach zatrymanych i pačać šyroki dyjaloh, piša Svaboda.
Fota Nadziei Bužan
U zajavie, ź jakoj 11 vieraśnia ad imia kiraŭnika AAN vystupiŭ jaho pres-sakratar, havorycca, što sytuacyja ŭ Biełarusi vyklikaje ŭ hieneralnaha sakratara hłybokuju tryvohu. Huteryša asabliva turbujuć niaspynnyja siłavyja dziejańni suprać mirnych pratestoŭcaŭ i zatrymańni ludziej, jakija ažyćciaŭlajuć svaje zakonnyja demakratyčnyja pravy. Jon taksama zaniepakojeny paviedamleńniami ab vykarystańni taktyki zapałochvańnia suprać pradstaŭnikoŭ hramadzianskaj supolnaści, ŚMI i apazycyi.
«Hieneralny sakratar AAN zaklikaje ŭłady ŭstrymacca ad užyvańnia siły suprać tych, chto ŭdzielničaje ŭ mirnych schodach, i damahčysia taho, kab abvinavačańni ŭ katavańniach i žorstkim abychodžańni z zatrymanymi byli całkam raśśledavanyja», — zajaviŭ pres-sakratar Huteryša.
Kiraŭnik AAN padkreśliŭ, što «ciapierašni kryzis mohuć pieraadoleć tolki samyja biełarusy šlacham šyrokaha, inkluziŭnaha dyjalohu». Jon pierakanany, što ŭ intaresach stabilnaści hety dyjaloh treba pačać nieadkładna.
