3 vieraśnia televiadoŭcu Dźmitryja Kachno asudzili na 10 sutak administracyjnaha aryštu za ŭdzieł u niesankcyjanavanaj akcyi, piša Svaboda.
Sudovy praces nad Dźmitryjem Kachno prajšoŭ u Pieršamajskim rajsudzie Miensku. Sudziŭ jaho pa videasuviazi sud́dzia Maksim Trusievič.
Dźmitry Kachno adrazu chadajničaŭ ab źmiakčeńni jamu miery strymańnia ŭ suviazi z tym, što u jaho 2-chhadovy syn i ciažarnaja žonka.
Kachno sudzili za toje, što ŭdzielničaŭ u niesankcyjanavanym šeści 23 žniŭnia pa praspekcie Niezaležnaści, trymaŭ na plačach bieł-čyrvona-bieły ściah, vykrykvaŭ «Viadoŭcy z narodam». U jakaści dokazu sudździa pakazaŭ Kachno zdymak z šeścia ŭ Instahram.
«Bačna vam?» — pierapytaŭ sudździa. «Tak, bačna. Tolki nia baču kolkaści łajkaŭ» — adkazaŭ Dźmitry Kachno. Kachno raspavioŭ, jak jaho zatrymlivali 1 vieraśnia: niekalki čałaviek sa zbrojaj da jaho padbiehli ŭ dvary doma, pakłali na darohu, potym u mikraaŭtobusie «jak złačyncu, pastavili na kaleni».
Vinu Dźmitry Kachno pryznaŭ całkam. Skazaŭ, što ŭdzielničaŭ u šeści z metaj «vykazać svaju hramadzianskuju pazycyju». Pryznaŭ, što na plačach u jaho byŭ bieł-čyrvona-bieły ściah.
Kachno sudzili ŭ kabinecie sudździ, nie ŭ sudovaj zali. Sakratar sudu skazała, što volnych zalaŭ niama. U kabinet upuścili tolki žonku i maci Kachno, a taksama 5 žurnalistaŭ.
Advakat Anton Hašynski davodziŭ sudu, što Dźmitry Kachno «sacyjalna nie niebiaśpiečny». Advakat miarkuje, što vychodziačy na šeście Kachno realizavaŭ svajo kanstytucyjnaje prava na vykazvańnie mierkavańniaŭ. Sud vyrašyŭ, što vina Kachno dakazanaja.
